Komisioni Europian ka propozuar futjen e një çertifikate dixhitale që vërteton se dikush është vaksinuar për Covid-19.
Presidentja e KE, Ursula von der Leyen, thotë se çertifikata do të dokumentojë gjithashtu teste negative dhe nëse personi ka pasur Covid më parë.
“Cili është funksioni i kësaj çertifikate? Ajo tregon … nëse personi është vaksinuar ose (ka pasur) një test negativ të kohëve të fundit ose është rikuperuar nga Covid dhe kështu ka antitrupa,” tha ajo një konference shtypi.
“Certifikata do të sigurojë që rezultatet të njihen reciprokisht në çdo shtet anëtar”, shton ajo.
Të gjitha këto pasaporta duhet të përfshijnë edhe të dhënat për datën e vaksinimit apo testimit, emrin e institucionit që e ka bërë testin apo vaksinimin, emrin e vaksinës dhe afatin e vërtetimit.
Për momentin, sipas sqarimeve të Komisionit Evropian, pasaportat duhet të lëshohen në të gjitha vendet e BE-së dhe të pranohen në të gjitha shtetet tjera të BE-së si dhe shtetet e zonës Shengen, të cilat nuk janë anëtare të Bashkimit Evropian.
Komisioni Evropian ka nënvizuar se edhe shtetasit e huaj, me qëndrim në BE, kanë të njëjtat mundësi dhe të drejta për t’u pajisur me pasaporta.
Sa u përket pasaportave të lëshuara nga shtetet tjera joanëtare të BE-së, ato do të shqyrtohen nga Komisioni më vonë në bazë të standardeve, të cilat i kanë aplikuar ato vende.
Për momentin, pasaportat për vaksinim që do të vlejnë në tërë territorin e BE-së, të cilat vërtetojnë se personi është vaksinuar me njërën prej vaksinave, të cilat janë miratuar për përdorim në tregun e BE-së.
Por, shtetet anëtare mund të vendosin vetë që të pranojnë edhe vaksinimin me vaksina tjera.
Kjo çështje është parashtruar si problem për shkak se disa shtete të BE-së kanë nisur të vaksinojnë qytetarët e tyre edhe me vaksina nga Rusia dhe Kina, të cilat ende nuk janë miratuar nga autoritetet e BE-së.
