Pas takimit të zhvilluar të zyrtarëve të Lartë të Sigurisë Kombëtare në vend, ambasadores amerikane Kim dhe drejtues të lartë të Ushtrisë Amerikane në Europë, institucioni i Presidencës ka dhënë detajet.
Në njoftim thuhet se stërvitja me trupa “Defender Europe 21” drejtohet nga Komanda e Ushtrisë Amerikane në Evropë. Për nga numri i pjesëmarrjes së trupave ajo është stërvitja më e madhe në të cilën përfshihen edhe trupat e Forcave tona të Armatosura. Në këtë stërvitje do të marrin pjesë trupa nga 26 vende aleate. “Defender Europe 21” do të shtrihet në disa vende të rajonit tonë.
Presidenca bën me dije se qëllimi i këtij takimi, ishte koordinimi i masave paraprake, me objektivin e qartë, që faza përmbyllëse e kësaj stërvitje të madhe të realizohet me sukses të plotë.
Gjatë mbledhjes Meta ka thënë se NATO dhe partneriteti strategjik me SHBA janë shumë të rëndësishme për Shqipërinë dhe Ballkanin.
“Besimi i popullit shqiptar dhe mbështetja ndaj tyre janë unanime, ashtu sikundër edhe vokacioni evropian i Shqiptarëve”, ka deklaruar ai.
