Drejtoria e Përgjithshme e Doganave ka njoftuar se katër automjete luksi janë bllokuar ditën e sotme për shkak se pretendohet se ishin kontrabandë.
Bëhet me dije së Drejtoria e Përgjithshme të Doganave, në bashkëpunim me Drejtorinë e Policisë Tiranë, kanë ushtruar kontrolle të vazhdueshme duke sekuestruar katër automjete të tipit Mercedes Benz dhe Range Rover.
Mësohet se detyrimi doganor i shmangur për këto 4 automjete kap shifrën e 5.2 milionë lekë, ndërsa vlera doganore e mallrave e kalon shifrën e 200 mijë eurove. Me akuzën për “Kontrabandë me mallra të tjerë” dhe “Falsifikimi i dokumenteve”, materialet hetimore iu referuan Prokurorisë, pranë Gjykatës së Shkallës së Parë Tiranë.
Drejtoria e Përgjithshme e Doganave, bën me dije më tej, se ky operacion është në vazhën e planit kuadër kundër informalitetit.
