Situata e koronavirusit duket se po del jashtë kontrollit në shumë shtete të botës, pasi janë rritur ndjeshëm shifrat e të prekurve, të të shtruarve në spitale dhe të viktimave po ashtu. Së fundmi në Amerikë janë raportuar më shumë se 200 mijë të infektuar në një ditë dhe ndërkohë janë mbi 65 mijë të shtruar në spitale.
Kjo ka bërë që të shtohen masat dhe izolimet në disa shtete amerikane. Mjeku shqiptar Skënder Murtezani, i cili punon si epidemiolog në Nju Jork, vazhdimisht jep rekomandime, sikurse ishte edhe apeli i tij pak kohë më parë që nëse maskat mbahen rregullisht për 6 javë, virusi mund të zhdukej me 90% probabilitet.
Ai beson se luhatjet emocionale të pacientëve të infektuar tregojnë për një lloj depresioni. Në një lidhje ‘Skype’ nga Nju Jorku për ‘Wake Up’, mjeku epidemiolog Skënder Murtezani tha se nuk është dakord për një izolim të dytë, por sugjeroi se duhet disiplinë.
“Unë më shumë do kisha thënë disiplinë, sesa izolim të plotë. Nuk jam që të shkohet në atë ekstrem. Por, po të sillemi mirë, në mënyrë të disiplinuar, me maskën e pastër, distancën, besoj se kjo luftë do fitohet. Të jemi të gjithë bashkë në këtë disiplinë”, theksoi mjeku.
Për sa i përket vetëvrasjeve të pacientëve me Covid-19, ai u shpreh: “Unë kam 4 raste që kanë pësuar psikozë, jo vetëvrasje. Spitalet në Amerikë janë jashtëzakonisht të organizuar. Psh. Në pranimin e pacientët në spital, infermierët bëjnë një test, janë 10 kategori në to. Nëse pacienti është në njërën nga këto kategori, duhet që psikologu të jetë aty.
Infermieri gjithashtu komunikon çdo ditë me pacientin. Stafi mjekësor duhet të ketë syrin hapur me këto pacientë. Sigurimi në këto spitale duhet të jetë absolut”.
