Kryeministri Edi Rama u ndal sot te punësimet me meritë përmes portaleve të krijuar enkas për arsimtarët dhe infermierët, ndërsa shtoi se “të gjitha këto bien sa hap e mbyll sytë, mjafton të votosh Lulin dhe merr Ilirin dhe Monikën”.
“Çdo prind që sot ka një fëmijë në shkollë duhet ta dijë shumë mirë që puna jonë nuk ka mbaruar dhe këtu nuk është çështja se punën tonë po vjen e vazhdon dikush tjetër. Këtë punë o e mbarojmë ne, ose të tjerët e kthejnë së prapthi prapë, siç ka ndodhur sa herë u është dhënë mundësia të bëjnë një punë”, tha Rama nga Fieri, në aktivitetin “Deputeti që duam”.
Kryeministri theksoi se “patjetër që shkolla ka ende shumë për të përmirësuar, por fëmijët tuaj sot nuk janë më pengje të autorëve injorantë, kopjacë, anonim, që shkruanin vargje të tërë me libra që nuk i duheshin as dreqit sa as mësuesit nuk arrinin t’i kuptonin”.
“Fëmijët sot kanë 3 alternativa tekstesh të Oksfordit, Kembrixhit dhe Pearson. Fëmija sot nuk ka mësues që i sjell aty ndërmarrja e Xhikes apo Monikës, apo PD, por vijnë përmes portalit “Mësues për Shqipërinë”. Dhe janë aty dhe mund të japin lirisht dijet e tyre, të kenë lirisht opinionet e tyre për politikën”.
Madje, vijoi Rama, “mund të dalin siç kanë dalë ditët e fundit të bëjnë edhe deklarata krah për krah me kryetarin e PD-së se sa e shtrenjtë është kura e COVID dhe sa keq po është kjo punë dhe të vazhdojnë punën”.
“Ku ndodhte kjo më parë. Këtë ia them dhe mësuesve, gjërat mund të përkeqësohen nëse ju nuk bëni dallimin e qartë mes opinioneve dhe interesit tuaj profesional për të pasur qëndrueshmëri në punën tuaj nesër. Mund të vijnë prapë kohëra të tmerrshme kur ju flaknin nga puna vetëm e vetëm që t’i hapni vendin dikujt tjetër. Po kështu infermierëve e mjekëve dhe të gjithë të tjerëve, deri tek këta që punojnë tokën. E dinë mirë se çfarë hiqnin kur skemat e mbështetjes i bënte partia. Sot kanë të gjithë akses te skemat e mbështetjes”, tha Rama.
Ai theksoi se edhe “biznesi i vogël ka arritur aty ku as e ka ëndërruar dhe as ne vetë nuk e kishim menduar më parë”. “Zeruam taksën e fitimit dhe TVSH-në, do t’u heqim nga qafa dhe kontrollet e inspektorëve. Po shohin më pak inspektorë dhe nuk do shohin më. Janë të lirë të punojnë, të jenë korrekt në deklarimet e tyre. Askush nuk i kërkon taksë, TVSH. Askush nuk i çon në kontroll, të gjitha kontrollet mund të bëhen në mënyrë dixhitale”, tha Rama.
