Prokuroria e Posaçme kërkon ndryshimin e akuzës për Blendi Tetën, të dyshuarin kryesor për vrasjen e ish-policit Santiago Malko.
Nga “vrasje me paramendim”, SPAK kërkon që akuza të ndryshohet në “vrasje për hakmarrje”.
Blendi Teta është i vetmi i arrestuar nga grupi i personave të dyshuar se kanë lidhje me vrasjen e Malkos në 27 gusht të 2019-ës.
Ai u la fillimisht në burg me akuzën e “moskallëzimit të krimit”, por pas kqyrjes së kamerave të sigurisë, Prokuroria konkludoi se Teta ishte i pranishëm në vendin ku u ekzekutua Malko, dhe kërkoi ndryshimin e akuzës në “vrasje me paramendim”.
Personat e tjerë të dyshuar si të përfshirë në këtë ngjarje, që mendohet të jenë pjesë e një grupi të strukturuar kriminal janë vëllezërit Leonard dhe Elis Duka, Fatmir Hyseni, Xhoni Nica, Oltian Loka, Ilir Selmani, Aleksandër Maxhaku dhe Dritan Agaj.
Seanca e sotme është shtyrë pasi Teta nuk ka qenë i pranishëm në sallë, ndërsa seanca e radhës është vendosur të mbahet në 3 nëntor.
