Kryeministri Edi Rama ka prezantuar sot platformën “Deputeti që duam”, një platformë që ka për qëllim vlerësimin e punës së deputetëve të Partisë Socialiste dhe jo vetëm.
Rama tha se kjo platformë do të funksionojë edhe për ata të cilët kanë dëshirë t’i bashkohen ekipit të PS-së në zgjedhjet e 25 prillit.
Kreu i PS-së tha se kush ka dëshirë të konkurrojë për kandidat për deputet të PS-së mund ta bëjë këtë gjë përmes kësaj platforme.
“Ftesë e hapur për të gjithë ata që kanë ambicie, kurajo, të hyjnë në fushën e 25 prillit si pjesëtarë të skuadrës sonë. Ne i kemi praktikisht të miratuar kriteret në asamblenë kombëtare. Do të kenë të gjithë një adresë online ku do të çojnë një video, ku do të shprehin arsyet pse duan të bëhen pjesë, dhe pak dokumente të tjera, një CV personale dhe një letër angazhuese. Ne do të mbledhim të gjitha shprehjet e interesit që do të vijnë nga të gjitha rrugët e jetës. Do të presim të rin dhe të reja, jo vetëm në moshë, por edhe në ide”, u shpreh Rama.
