Ka marë fund enigma e mbledhjes së njërës prej strukturave më të rëndësishme drejtuese të Partisë Socialiste. Të premten e kësaj jave, nën drejtimin e Kryeministrit Edi Rama, socialistët do të mblidhen për të konstituar Asamblenë Kombëtarë, të zgjedhur sipas parimit një anëtar një votë, në Kongresin Zgjedhor të 29 shkurtit të këtij viti.
Por atëherë kur pritej që ky organ i rëndësishëm drejtues, të mblidhej, Shqipëria u mbyll sipas protokolleve të Organizatës Botërore të Shëndetësisë për shkak të shpërthimit të pandemisë globale nga Covid-19. Në këto kushte, mbledhje e Asamblesë Kombëtare të Partisë Socialiste është shtyre, nga pamundësia e zhvillimit të një takimi të tillë, për shkak të rregullave të distancimit social që duhet të zbatohen ende.
Interesimi i mediave ka qenë shumë i madh, madje edhe dje gjatë prezantimit të platformës së re online të PS, Kryetari Edi Rama është pyetur sërisht nga gazetarët. Ai konfirmoi se takimi do të zhvillohej sëshpejti. Nuk kaluan as 24 orë dhe burimet zyrtare të PS, konfirmojnë se Asambleja e PS do të mblidhet të premten, datë 9 tetor 2020 në orën 15.30 në Amfiteatrin Veror të Liqenit Artificial të kryeqytetit. Një ambjent i hapur që garanton edhe pjesëmarrjen masive por edhe marjen e masave të domosdoshme, nga pandemia.
Në këtë mbledhje pritet të zgjidhet Kryesia e re e PS, Sekretariati dhe Sekretari i Përgjithshëm. Mbajtja e maskës do të jetë e detyrueshme për të gjithë pjesëmarrësit. Kjo mbledhje zhvillohet vetëm pak ditë pas sot në Parlament votohen ndryshimet kushtetuese që i hapin rrugën përfundimisht përcaktimit të rregullave të lojës për zgjedhjet e përgjithshme parlamentare të 25 prillit 2021. Me këtë hap, PS ndez “zyrtarisht” motorrët e makinës elektorale, për fushatën ku synon të fitojë mandatin e tretë radhazi qeverisës të saj.
Alpenews.al
