Komisioni i Posaçëm i Apelimit ka vendosur datën 23 tetor, si datën kur do të bëhet rivlerësimi i prokurorit të Apelit të Tiranës, Luan Kaloçit.
Seanca në dhomë këshillimi do të zhvillohet në ambientet e Kolegjit të Posaçëm të Apelimit, ndërsa trupa gjykuese do të përbëhet nga gjyqtarët: Rezarta Schuetz, relatore Natasha Mulaj dhe anëtarë: Albana Shtylla, Ina Rama dhe Luan Daci.
Prokurori i Apelit të Tiranës, Luan Kaloçi u shkarkua nga detyra më 5 korrik 2018, pasi Komisioni i Pavarur i Kualifikimit arriti në përfundimin se ai kishte fshehur origjinën e krijimit të një apartamenti dhe një dyqani në Tiranë.
Në deklarimin e bërë në vitin 2003 për blerjen e një dyqani ai specifikoi si burim të ardhurash 5.2 milionë lekë të fituara në baste sportive. Ndërsa në vitin 2017, për të njëjtën pronë, deklaronte të ardhura nga shitja e një banese në Elbasan.
KPK deklaroi gjatë procesit se kishte mospërputhje pasi prokurori kishte bërë deklarim të rremë, duke sqaruar se kishte fituar edhe një shumë prej 5,2 milionë lekësh në një loto sportive.
Kaloçi ishte pjesë e listës prioritare të Vettingut si njëri prej 19 kandidatëve për Këshillin e Lartë të Prokurorisë.
