Kryeministri Edi Rama u ka dërguar një mesazh të qartë dhe të prerë, të zgjedhurve në bashki dhe drejtuesve politikë të Partisë Socialiste, ku thekson se profili i administratoreve duhet të jetë “profil shërbëtori i komunitetit”, jo profile të fortësh, injorantësh, batakçinjsh, feudalesh partiake. Rama gjithashtu ka dhënë porosi për kandidaturat që do të propozohen për stafin politik të PS. Sipas tij, propozimet duhet të jenë me njerëz të ditur, të edukuar, e të respektuar.
“Në mbledhjen e KD në fund të gushtit, duhet të sillni propozimet për stafin politik, dmth nënkryetarët dhe administratorët (minimumi dy propozime). Një nënkryetar duhet të jetë medoemos grua dhe kjo vlen edhe për bashkitë e majta – kush s’e ka do ta gjejë e ta vendosë!”, shprehet Rama në mesazhin e tij që është publikuar nga disa media vizive.
Sipas kryeministrit, profili i administratoreve duhet të jetë “profil shërbëtori i komunitetit”, jo profile të fortësh, injorantësh, batakçinjsh, feudalesh partiake! “Zgjedhja e tyre duhet të mirëpritet jo thjesht nga partia e zonës, po nga komuniteti i zonës dhe më mirë të mërzitet partia se sa komuniteti! Mbajeni parasysh që nuk kam për të pranuar kandidatura nga ato tipiket që dredhin zinxhir se medemek marrin vota! Mos kemi llafe për këtë ju lutem”, shprehet Rama.
Kryeministri ka kërkuar që edhe drejtorët aktualë në bashkitë e djathta mos të cenohen deri në mbledhjen në fund të gushtit, por të përpilohet raport për ta, duke filluar nga formimi profesional, niveli i militantizmit, lidhjet nepotike dhe niveli i punës së tyre konkrete në bashki. “Po ashtu, një listë propozimesh (minimumi dy për një vend) për zëvendësues eventualë, mundësisht të konsultuar paraprakisht me deputetët”, është porosia e Ramës, i cili nuk lë mënjanë që secili nga kryetarët e zgjedhur të bashkive të përgatisë edhe një raportim të përmbledhur të situatës, nevojave dhe problemeve kryesore, ndërsa u kujton se datën dhe një axhendë të plotë të takimit do ta marrin nga Sekretari për koordinimin e Këshillave Drejtues të Rajoneve, Ilir Beqja.
Një ultimatum i tij është që asnjë nga ish kryetarëve e komunave në bashkitë e djathta përpara vitit 2015 të mos propozohet për administrator, me qëllim që mesazhi i 30 qershorit të jetë i qartë për opozitën. “Edhe një merak paraprak që mos i ngrini mendjen kujt: Asnjë nga ata që kanë qenë kryetare komunash përpara 2015 në bashkitë e djathta, mos ma sillni propozim për administrator! Janë të nderuar e të respektuar për kontributet e tyre, po mos harroni mesazhin e 30 qershorit, populli, pavarësisht kush ka votuar e kush jo, nuk e ka mbështetur rrugën që zgjodhëm për të majtën, po për të drejtën!”, shprehet Rama në mesazhin për të majtës.
Madje, ai ka kërkuar që partia të tregohet e hapur dhe të mos fokusohet vetëm tek ata që kanë sjellë vota, pasi sipas tij, shumë të tjerë mund të sjellin dhe më shumë, pasi ata nuk janë të vetmit. “Kjo do të thotë ndër të tjera se jo vetëm s’duhet të japim shenja që lexohen si mbyllje brenda gardhit tonë, po duhet të bëjmë çmos që shenjat që japim me vendimet tona, të kuptohen si vullnet hapjeje e gjithëpërfshirëse me njerëz të ditur, të edukuar, të respektuar, të cilët mund të mos kenë sjellë vota, sepse nuk kanë qenë të angazhuar direkt për shkak të mbylljes së partisë ndër të tjera, por që mund të na sjellin shumë më tepër vota në 2021-shin, se sa të tjerë që duken sikur janë të vetmit, por nuk janë!”, deklaron kreu i PS, i cili përfundon letrën me një kujtesë për të gjithë të zgjedhurit e 30 qershorit; Dhe mos e harroni: PS fitoi për ju në 30 qershor. Ju duhet të bëni gjithçka që PS të fitojë për Shqipërinë në qershor 2021! Kjo është në themel të krijimit të Këshillave Drejtues të Rajoneve”.
