Kryetari i Partisë Demokratike Lulzim Basha, me rastin e 27 vjetorit të Partisë Demokratike shprehet se kjo forcë politike ndryshoi jetën e miliona shqiptarëve.
Ai shprehet se kjo parti udhëhoqi shëmbjen e diktaturës komuniste dhe rrugën drejt Bashkimit Europian.
Më tej ai garanton se do të përmbushen idealet në të ardhmen për liri dhe demokraci.
“Sot 27 vite më parë lindi Partia Demokratike, forca që ndryshoi Shqipërinë dhe jetët e miliona shqiptarëve një herë e përgjithmonë, forca që i priu shembjes së diktaturës komuniste, dhe rrugëtimit tonë drejt Europës dhe zhvillimit.
Me respekt dhe mirënjohje të thellë për themeluesit, për qëndrestarët dhe për të gjithë mbështetësit, militantët dhe anëtarët e Partisë Demokratike ju ftoj sot të mblidhemi bashkë në orën 18:00 në Pallatin e Kongreseve në shenjë nderimi por edhe përgjegjësie për atë që kemi përpara: Përmbushjen e idealeve tona për liri, demokraci dhe mirëqenie për të gjithë shqiptarët,” thotë Basha. (TemA)
