Zgjedhjet lokale të 30 qershorit, do të jenë në qendër të kongresit të lajmëruar të Partisë Socialiste, të shtunën e 23 marsit. Në një intervistë për RTSH-në, sekretari për median dhe shoqërinë civile, Alfred Peza, thotë se nuk pritet konfirmimi i listës me 61 kandidatët zyrtarë të PS-së për bashkitë, por do të komunikohet lista e këshilltarëve bashkiakë të Tiranës. Në fokus do të jenë gjithashtu, modelet e suksesit të bashkive që drejtohen aktualisht nga socialistët.
Kongresi i marsit ishte në fokus edhe të mbledhjes së përjavshme të kryesisë, e cila ka caktuar Damian Gjiknurin, sekretar për çështjet zgjedhore dhe reformën zgjedhore. Pas mbledhjes së grupit parlamentar, në një komunikim me mediat, kreu i grupit, Taulant Balla, tha se me deputetët e rinj të opozitës do të përmbyllet Reforma Zgjedhore. Balla gjithashtu shprehu bindjen se opozita nuk do të zhgënjejë votuesit, duke mos marrë pjesë në zgjedhjet e 30 qershorit. Kongresi i PS-së, në 23 mars, pritet të mbledhë bashkë edhe ish drejtuesit e partisë në vite, si të dërguar nga partitë simotra./Rtsh
