Pothuajse 20 vjet më parë, brenda natës, gazetat nisën të shkruanin për atë që u quajt “vjedhja e shekullit”.
Grabitja e arit në Krrabë në fakt ishte një ngjarje e paralajmëruar, por që për më shumë se gjashtë muaj nuk u mor seriozisht nga pothuajse askush, edhe sepse tunelet e Krrabës, një objekt i sigurisë së veçantë, konsideroheshin si vendi më i ruajtur dhe më i sigurtë në të gjithë Republikën.
Në fillim të vitit 2000, Sali Berisha tanimë në opozitë ishte i pari që foli për këtë vjedhje. Pas gjysmë viti, e vërteta doli në shesh dhe qeveria Meta pranoi se thashethemet për zhdukjen e 280 kilogramëve ar në mars të vitit 1997 (sipas raportimeve zyrtare) ishin të vërteta.
Si shumë ngjarje të ndodhura në vitet 1990, si eliminimi i Haklajve në Kërrnajë, vrasja e Azem Hajdarit dhe shumë histori të tjera, edhe grabitja e arit në Krrabë vazhdon të jetë e zhytur në një tis misteri. Pikë së pari, autoritetet e kohës asnjëherë nuk mundën të zbulonin një shifër të saktë, se sa kilogram ar ishin vjedhur.
E dyta, dinamika e ngjarjes nuk u mor vesh kurrë. Sipas versionit zyrtar, 5 nga rojet e tunelit bashkëpunuan me hajdutët, por këta të fundit nuk u identifikuan.
Më 7 shkurt të vitit 2001, pas një procesi qe nisi me 27 tetor 2000, Gjykata e Tiranës vendosi dënimin e pesë të pandehurve Ahmet Hyka, Enver Hyka, Pëllumb Dalti, Arjan Bishqemi dhe Blerim Haka nën akuzën e “vjedhjes së thesarit të shtetit”, në bashkëpunim.
Gjyqtari i çështjes Petrit Çomo, pasi shqyrtoi të gjitha provat në dosje si dhe kërkesat e bëra nga prokurori dhe mbrojtja, vendosi t’i deklarojë fajtorë të pandehurit, duke dënuar me 8 vite burg Ahmet Hykën, 6 vjet për Pëllumb Daltin, 3 vjet e gjysmë për Enver Hykën, 20 muaj burg për Arjan Bishqemin dhe 2 vjet për Blerim Hakën. Ky vendim u la ne fuqi dhe nga dy shkallet e tjera te gjyqesorit.
