Policia italiane e provincës së Piacencës ka shkatërruar një bandë grabitësish banesash e përbërë nga 3 shtetas shqiptarë.
Gjatë 20 ditëve të fundit ata kishin kryer 18 grabitje vilash e banesash në komunat e Monticelli d’Ongina, Castelvetro Piacentino, Villanova sull’Arda, Caorso, San Pietro in Cerro e Cortemaggiore.
Hetimet e policisë italiane kanë nisur gjatë muajit gusht, pas sinjalizimeve të shumta të banorëve të provincës së Piacencës për numrin e madh të grabitjeve në territorin e tyre.
Pas vënies nën kontroll të zonës, policia italiane ka mundur të identifikoj automjetin tip Volvo e cila përdorej nga anëtarët e bandës e më pas të vë nën pranga 3 shqiptarët.
Policia italiane ka denoncuar dhe të fejuarën e njërit prej shqiptarëve të arrestuar. Ajo është një 28 vjeçare shqiptare e cila ishte transferuar të jetonte në Romë duke marrë me vete një pjesë të objekteve të grabitura nga banda me një vlerë prej 20 mijë euro. Ndër objektet e sekuestruara janë çanta të markave luksoze, bizhuteri e para cash.
