Një shenjë në lëkurë për të rifilluar jetën. Në 13 nëntor 2015 një sulm terrorist goditi mu në zemër Parisin, duke vrarë 130 persona dhe duke plagosur më shumë se 350 të tjerë.
Pjesa më e madhe ë viktimave ishin gjatë një koncerti në sallën e Bataclan. Mes të mbijetuarve janë të shumtë ata që kanë zgjedhur të kujtojnë atë ditë me një tatuazh. Një formë terapie që francezi Joel saget, fotografi i agjencisë AFP, i ka fotografuar në një seri fotosh, të publikuar në përkujtim të dy vjetorit të tragjedisë.
‘Kam notuar në gjakun që kishte mbuluar trupat dhe kisha përshtypjen sikur ecja me trupat mbi shpatulla’, tregon Laura Leveque, 32 vjec e cila ka qenë mes personave të marrë peng në Bataclan. Për këtë arsye ajo ka bërë tatuazh në krah një sorrë të madhe, një gjarpër që i pickon bishtin ‘për të treguar në këtë mënyrë ciklin e jetës dhe të vdekjes’ dhe ‘lule që rriten në fushën e betejës’.
David Fritz Goeppinger, 25 vjeç, ka qenë edhe ai një nga pengjet e Bataclan:’Dola prej andej pa asnjë plagë. Për këtë arsye doja të shkruaja me shkronja romake datën e sulmeve dhe simbolin V/V që do të thotë, ‘Ishim pesë përpara sulmit dhe jemi edhe pas tij’.
Sophie gjatë sulmit ka marrë një plumb në kofshë, shenja që i la goditja tani mbulohet nga një tatuazh i madh me figurën e ‘Calavera Catrina’, ikona e cila simbolizon ditën e të vdekurve në Meksikë.
Këto janë vetëm disa nga historitë e të mbijetuarve nga sulmet terroriste të 13 nëntorit. Për të gjithë ata, pas asaj nate tragjike, tatuazhi është bërë një shenjë për të kujtuar dhe duruar dhimbjen.
