Ferizaj në Kosovë u trondit nga një ngjarje e rëndë ditën e djeshme, ku 18-vjeçarja Marigona Osmani u la e vdekur nga dy të rinj në derën e spitalit. Njëri prej të rinjve, Arbër Sejdiu, 32 vjeç, u arrestua dje nga policia, ndërsa vijon të jetë në kërkim 29-vjeçari Dardan Krivaqa.
Në një intervistë për “Express”, daja e viktimës ka rrëfyer se viktima ka qenë e martuar prej dy muajsh me Dardan Krivaqa dhe se familja nuk kishin dijeni nëse ajo ka patur probleme me bashkëshortin.
“Unë jam daja i M. Dje e kemi marrë vesh dikur rreth orës 22:00, nuk kemi ditë diçka që ka ndodh. Por në bazë të informatave, e kemi marrë vesh që është mbesa jonë. Kemi ardhë këtu, kemi bisedu me familjen. Kjo është e vërtetë, ajo është martu që 2 ose 3 muaj…Vajza nuk ka tregu kurgjë që ka raporte të këqia, por në bazë të rrethanave, si dajë, kemi pyet kush është filani (burri i saj). Nuk kanë folë fjalë të mira, që është njeri i sjellshëm ose djalë i mirë, por e paska pas fatin…U njoftu me të, u martu, kur ka ardhë në shtëpi, se kam qëllu unë këtu një herë ose dy, më kanë thënë dajë mirë jemi duke kalu. Diçka që me thanë që s’po shkon mirë, s’na ka tregu”, ka thënë ai.
Krivaqi dhe Sejdiu u kanë nga kamerat e sigurisë, duke lënë 18-vjeçaren pa shenja jete në dyert e spitalit e pastaj largohen me një makinë ‘Audi A8’ me targa zvicerane me ngjyrë të zezë.
Për vrasjen e 18-vjeçares ditën e sotme në Ferizaj do të organizohet një protestë në shenjë revolte kundër dhunës ndaj grave.
Për ngjarjen e rëndë reagoi edhe kryeministri i vendit, Albin Kurti, i cili i bëri thirrje organeve të drejtësisë që të vënë para përgjegjësisë autorët. Po ashtu një reagim pati edhe nga Presidentja Vjosa Osmani, që iu kërkoi qytetarëve që të bashkëpunojnë me organet e drejtësisë që të gjendet një nga vrasësit e 18-vjeçares.
