Një sherr mes dy të rinjsh në Fier ka përfunduar tragjikisht për njërin prej tyre. D.Vrenozi, 16 vjeç, banues në Hoxharë të Vjetër, ka mbetur i vdekur me plagë të shkaktuara me mjet prerës, ndërsa autori i dyshuar i ngjarjes është shpallur në kërkim: F.G., rreth 17 vjeç.
Ngjarja
Rreth orës 16:30, është transportuar në Spitalin Rajonal Fier i plagosur me mjet prerës shtetasi D.Vrenozi, 16 vjeç, banues në Hoxharë të Vjetër. Pavarësisht përpjekjes së bluzave të bardha për ti ardhur në ndihmë, ai ka ndërruar jetë në spital.
Në bazë të protokollit, spitali ka njoftuar policinë që është vënë menjëherë në lëvizje dhe ka nisur hetimet për zbardhjen e ngjarjes.
Burime zyrtare nga policia e Fierit thanë se, dyshohet se ngjarja ka ndodhur në vendin e quajtur “Zogu i Zi”, ku pas një sherri mes dy të rinjve ka mbetur i plagosur me thikë shtetasi D.Vrenozi.
Ndërkohë, është shpallur në kërkim si autor i dyshuar i ngjarjes, F.G., rreth 17 vjeç. Forca të shumta policie nga Komisariati i Fierit dhe nga Sektori për Krimet e Rënda kanë ngritur pika të shumta kontrolli dhe po punojnë për kapjen e autorit, shtuan të njëjtat burime.
