Goditet një tjetër rast i kalimit të paligjshëm të kufirit me dokumente false nga Shqipëria me destinacion Anglinë kundrejt 15 mijë paundëve. Dy persona janë arrestuar ndërsa një tjetër është shpallur në kërkim nga policia. Të arrestuarit janë; V. L. 52 vjeç, lindur dhe banues në Mamurras dhe H. N. 19 vjeç, lindur dhe banues ne Burrel.
Sipas policisë nga hetimet ka rezultuar se 52-vjeçari me inicialet V. L. rezident në Itali, pasi kishte siguruar paraprakisht dokumente të falsifikuara italiane me gjeneralitetet e një personi tjetër, ka ardhur në Shqipëri dhe ka pajisur me këto dokumente 19-vjeçarin me inicialet H. N.
Pas pajisjes me këto dokumente 52-vjeçari do ta shoqëronte 19-vjeçarin nga aeroporti i Rinasit, transit drejt aeroportit të Venecias me destinacion final në aeroportin e Luttonit, në Mbretërinë e Bashkuar, kundrejt përfitimit 15 000 paund britanikë.
Por ëndrra e 19-vjeçarit për të shkuar në Angli dhe e 52-vjeçarit për të përfituar shumën e konsiderueshme është prerë në mes, pasi janë zbuluar dhe arrestuar. Ndërkohë që u bë shpallja në kërkim e një tjetër personi me inicialet A.L. i dyshuar si bashkëpunëtor. Në vitin e fundit janë realizuar disa goditje të trafikut të paligjshëm të shqiptarëve në Angli, por edhe SHBA e Kanada.
Materialet procedurale do t’i kalojnë Prokurorisë pranë Gjykatës së Shkallës së Parë Tiranë, për veprime të mëtejshme hetimore, për veprat penale “Ndihma për kalim të paligjshem të kufirit”, “Falsifikimi i letërnjoftimeve, pasaportave ose i vizave” dhe “Falsifikim i dokumenteve”.
