Policia duket se ka nisur një operacion të gjerë kundër njësive që merren me prodhimin e kriptovalutave në vend. Një ditë më parë u godit një njësi në Shijak ku u arrestua edhe një person, ndërsa blutë bëjnë me dije sot edhe për një rast tjetër në Durrës ku janë arrestuar tre persona.
Ata akuzohen për veprat penale të “Mashtrimit Kompjuterik”, “Ushtrimi pa liçencë i veprimtarive financiare”, “Fshehja e të ardhurave” dhe “Pastrimit të produkteve të veprës penale” .
Policia vlerëson se deri më tani, në këto njësi ishte investuar 1 milion euro, ndërsa janë sekuestruar pajisje të shumta.
Çfarë u sekuestrua
631 copë pajisje elektronike për prodhimin e kriptovalutave, 630 copë panele diellore, 360 copë pajisje elektronike për sigurimin e vazhdueshëm të energjisë elektrike, 71 copë pajisje kompjuterike për procesimin e të dhënave, 71 copë pajisje kompjuterike për ruajtjen e përkohshme të të dhënave, 71 copë Hard disqe të jashtme, 71 copë pajisje elektronike për stabilizimin e temperaturave, pajisje elektronike për shpërndarjen e internetit, pajisje kompjuterike të lëvizshme dhe dokumenta të ndryshme të subjekteve, fatura financiare, shënime të ndryshme etj.
