Michael Cohen, avokati personal i Presidentit Donald Trump, është “nën hetime penale”, ka konfirmuar sot Departamenti i Drejtësisë.
Në përgjigje të mocionit të Cohen për të ndalur provat e mbledhura në bastisjet e së hënës në shtëpinë dhe zyrën e tij, avokati amerikan në Nju Jork pohoi se bastisjet ishin të autorizuara nga një gjykatës federal për të kërkuar dëshmi të sjelljes “për të cilën Cohen është nën hetime penale”, siç raportoN CNN.
Ndërkohë anëtarë të Kongresit nga të dyja partitë po bëjnë përpjekje për të mbrojtur nga shkarkimi prokurorin special Robert Mueller. Zoti Mueller drejton procesin hetimor lidhur me rolin e Rusisë në zgjedhjet presidenciale të 2016. Në Uashington po shtohet shqetësimi mbi të ardhmen e tij, pasi presidenti shprehu kritika të forta për bastisjen që urdhëroi këtë javë prokurori special Mueller tek zyra dhe banesa e avokatit të tij personal, Michael Cohen.
Presidenti Trump sulmoi hetimet mbi Rusinë, pasi FBI-ja bastisi shtëpinë, zyrën dhe dhomën e hotelit të avokatit të tij personal, Michael Cohen:
“Është e turpshme, vërtetë e turpshme. Është sulm ndaj vendit tonë në kuptimin e plotë të fjalës; sulm ndaj parimeve që mbrojmë”.
Siç njoftohet, hetuesit po analizojnë se çfarë roli ka luajtur avokati i presidentit në pagesat që morën dy gra, aktorja e filmave pornografikë, Stormy Daniels dhe modelja e revistës erotike Playboy, Karen McDougal, të cilat kanë thënë se kanë pasur marrëdhënie intime me zotin Trump para se ai të bëhej president.
Ekspertët e FBI sekuestruan biseda midis Cohen dhe klientëve të tij, tha avokati i që ka marrë Cohen në një deklaratë pas bastisjes së zyrave.
Gjithashtu janë sekuestruar edhe dokumente që kanë lidhje me një pagesë për një aktore pornografike që ka deklaruar se do flasë për raportin e saj intim me Trump, thonë mediat amerikane.
“Sot Zyra e Prokurorit të Shtetit të Nju Jorkut ka ekzekutuar një sërë urdhërash kontrolli dhe ka konfiskuar komuniket midis klientit tim Michael Cohen dhe klientëve të tij”, tha avokati i z. Cohen, Stephen M Ryan në një deklaratë.
