“Llokumja e vogël. Zoti të ma fali”! Ky mesa duket ka qenë amaneti i fundit i Elena Alinj, 23-vjeçares shqiptare e cila u dhunua barbarisht nga bashkëshorti i saj, duke i shkaktuar asaj vdekjen.
Ngjarja e rëndë ka ndodhur në Amerikë, ku e reja Elena Alinj ishte larguar për një jetë më të mirë, pasi i kishte dalë lotaria. Pas martesës, ajo kishte sjellë në jetë një vajzë, e cila është 11-muajshe, dhe për fatin e keq tani do të rritet jetime.
Dhimbja dhe zija ka pushtuar familjen e Elenës, ndërsa presin trupin e saj të prehet në atdhe. Gjithashtu, prindërit e Elenës kërkojnë që të fitojnë të drejtën për të rritur vajzën e vogël jetime.
Ndërkaq, të afërmit e viktimës në një postim në “gofundme” kërkojnë ndihmë që trupi i saj të prehet në atdhe. Siç thuhet dhe nga postimi, vajza e re është dhunuar barbarisht nga burri i saj, i cili madje nuk kishte njoftuar as urgjencën.
23-vjeçarja humbi jetën brenda 24 orëve pasi ishte shtruar në reanimacion, pasi ajo kishte fraktura të shumta në brinjë, shtyllë kurrizore dhe të kafshuara në trup.
