Kryeministri Edi Rama ka reaguar për situatën e krijuar nga zjarri në malin e Krujës, duke thënë se u shmang një bilanc që mund të kishte qenë tragjik.
Në një reagim në rrjetin social X, Rama shkruan se zjarri përfundoi duke shkaktuar vetëm dëme të kufizuara, ndërsa nuk pati banorë të lënduar.
Sipas kryeministrit, përballja me flakët ishte veçanërisht e vështirë për shkak të erës dhe pamundësisë për të përdorur mjetet ajrore për shuarjen e zjarrit gjatë natës.
Reagimi:
Ka përfunduar me vetëm një magazinë të shkrumbuar dhe asnjë banor të dëmtuar, një betejë e jashtëzakonshme me zjarrin në malin e Krujës, ku në praninë e erës dhe në pamundësinë e natës për të përdorur mjete zjarrshuajtëse nga ajri, trupat tona zjarrfikëse, ushtarake e policore u përballën me heroizëm e me aftësi të spikatur profesionale, duke shmangur një bilanc që mund të kishte qenë tragjik siç fatkeqësisht po ndodh në vende të tjera të Europës në këtë verë përvëluese🔥🔥🔥
Respekt dhe mirënjohje për heronjtë tanë të vijës së zjarreve të këtij gushti sfidues, ku mbrëmë banorët e Krujës panë se nuk ishin vetën në orët e tyre tejet të vështira, siç dëshmon edhe ky mesazh ndër disa që më dërguan mbrëmë në orët e natës:
“Zoti Kryeminister ! Ju lutem zjarri po merr permasa te medha ne Kruje! Po punojne si heronj Zoti ia shperblefte …por era po e perhap me shume shpejtesi .ne eshte e mundur per perforcime te tjera ..shteti eshte ne kembe i teri 🙏”
