Zjarrfikësit në Gjermani po luftojnë për të marrë nën kontroll një nga zjarret më të mëdha të pyjeve në dekadat e fundit. Zjarri ka rënë rreth 50 km në jug të Berlinit.
Flaka u përhap gjatë natës së të enjtes në një zonë të barabartë me 500 fusha futbolli. Ekipet e zjarrfikësve, shumë prej të cilëve vullnetarë, kanë punën e tyre të komplikuar nga prania e municioneve të pashpërthyera. Qindra njerëz janë evakuar nga shtëpitë e rrezikuara nga zjarri.
Autoritetet thanë se 540 persona nga tre fshatra janë zhvendosur në vende më të sigurta, kryesisht strehim emergjent. Zjarret pranë fshatit Treuenbrietzen u vunë nën shënjestër nga helikopterët që hidhnin ujë nga lart.
“Kam respekt të madh për zjarrfikësit që janë atje tani, duke rrezikuar jetën e tyre. Ne e dimë se ka municione në pyll”, tha politikani lokal Günter Baaske.
Municionet mendohet se datojnë nga veprimet e Ushtrisë Sovjetike në ish-Gjermaninë Lindore, gjatë Luftës së Dytë Botërore. Z. Baaske shtoi se disa shpërthime ishin dëgjuar.
Autoritetet thanë se zjarri tani është nën kontroll, por që mund të duhet ditë për të shuar plotësisht. Zjarri besohet të jetë vendosur qëllimisht.
Korrespondenti i BBC në Berlin, Jenny Hill, raporton se njerëzit që jetojnë në kryeqytet u është thënë të mbyllin dyert dhe dritaret e tyre për shkak të një reje tymi.
