Kina ka përqendruar edhe njëherë vëmendjen ndërkombëtare në sistemin ligjor të saj dhe përdorimin e paraburgimeve sekrete.
Ky qëndrim vjen pikërisht në një kohë kur janë zhdukur dy qytetarë kinezë të profilit të lartë.
E para që u zhduk ishte aktorja Fan Bingbing, e cila është shfaqur gjithashtu ne filmin X-Men dhe Iron Man. Ajo nuk u pa në publik muaj me radhë gjatë verës dhe heshti në mediat sociale, para se të kthehej në fillim të tetorit me një kërkesë faljeje për të shmangur taksat.
Dy ditë pasi u shfaq sërish, rezultoi që presidenti i agjencisë së policisë globale Interpol, Meng Hongwei, ishte zhdukur gjatë një udhëtimi në Kinë. Gruaja e tij thotë se komunikimi i tij i fundit me të ishte një tekst me një simbol thike, përmes së cilës ajo kishte kuptuar se i shoqi ishte në rrezik. Ndërsa autoritetet njoftuan më 8 tetor se Hongwei po hetohet për marrje ryshfeti.
Zhdukjet me forcë nuk janë asgjë e re në Kinë, ndonëse rastet e sipërpërmendura kanë shkaktuar një vale të vëmendjes ndërkombëtare.
Zhdukjet mund të synojnë njerëz nga sfera te ndryshme të jetës: avokatë të të drejtave të njeriut, zyrtarë të korruptuar, zyrtarë që janë në shënjestër për arsye politike, shitësit e librave që publikojnë material që zemërojnë liderët e partisë ose njerëz të shquar që bien ndesh me interesat e partisë.
Megjithatë, përsa i përket partisë, individët që janë hetuar nuk janë “zhdukur”. Ata ndalohen sipas një procesi shumë të orkestruar dhe burokratik. Ata që zhduken papritur, vendosen në paraburgim, për t’u rishfaqur më pas për të deklaruar fajin e tyre dhe për të kërkuar falje.
