Një 21 vjeçar me origjinë dhe banues në Burrel prej 9 ditësh ka humbur kontaktet me familjen e tij. Kontakti i fundit që 21 vjeçari Klevis Lleshi ka pasur me familjen ka qenë me 5 gusht në orën 14:48.
Sipas denoncimit të nënës së tij, ai është larguar nga banesa me disa shokë për të pirë një kafe, por nuk është kthyer më në banesë.
Fillimisht familjaret e kanë denoncuar rastin në Polici e me pas në Prokurorinë e Burrelit duke dhënë të gjitha deklarimet dhe emrat e shokëve që e shoqëronin atë ditë. Menjëherë policia ka shoqëruar 4 shokët që shoqëronin 21 vjeçarin ditën kur humbi çdo kontakt me familjen. Në pyetje janë marrë edhe të afërm me të cilët shoqërohej më së shumti.
Në deklaratat e tyre ata shprehen se nuk kanë asnjë informacion për mënyrën se si është zhdukur dhe kanë shtuar se përpara tyre 21 vjeçari nuk kishte shprehur asnjë shqetësim.
Familjarë të Klevis Lleshit, janë shprehur se kanë dyshime se shokët e të riut nuk kanë treguar të vërtetën dhe se mund të jetë njëri prej tyre që e ka çuar 21 vjeçarin tek hasmi i tyre.
Familja Lleshi është në hasmëri me familjen e Ali Hoxhës nga Shtjefëni që prej 7 vitesh. Në vitin 2013 fillimisht 21 vjeçarit i është vrare babai ndërsa 4 vite më vonë në 2017 do të vritej xhaxhai i tij. Ndërkohë që 6 muaj mbrapa është zhdukur edhe djali 40 vjeçar i kunatit.
Duke qenë se prej gati 10 ditësh familjaret e Klevisit nuk kanë marrë asnjë pergjigje nga autoritetet ata janë drejtuar në policinë e Tiranës për të bërë një tjetër denoncim, ndërsa kanë kërkuar takim me ministrin Sandër Lleshaj për ta ndihmuar në gjetjen e djalit.
