Zgjedhjet primare të demokratëve në Amerikë kanë nxjerrë të martën fitues ish-zv.presidentin Xho Bajdën. Ai ka siguruar 10 nga 14 shtetet e mundshme, ndërsa rivali Bërni Sendërs ka triumfuar në shtetin me më shumë delegatë, në Kaliforni. Njëri prej tyre pritet të sfidojë presidentin Donald Trump në zgjedhjet e 3 nëntorit.
Ish-zëvendëspresidenti, Xho Bajdën, ka dalë fituesi më i madh i zgjedhjeve paraprake të Partisë Demokratike për presidencialet e vitit 2020.
Në votimet e “Super-të-Martës”, 77-vjeçari siguroi 10 nga 14 shtetet në garë, përfshirë shtetin e dytë më të madh të SHBA-së, në Teksas, por edhe në bastionet e Virxhinias dhe të Karolinës së Veriut.
Ndërkohë, rivali i tij më i afërt, senatori Bërni Sendërs, fitoi tre shtete dhe Kaliforninë, që ndan numrin maksimal prej 400 delegatësh.
“Fushata jonë reflekton diversitetin e kësaj partie dhe të këtij kombi. Na duhet ta mundim Donald Trampin sepse nuk jemi si ai, nuk duam luftëra partiake pa fund. Ne jemi në garë dhe mos kini asnjë dyshim se do e detyrojmë Trampin të bëjë gati valixhet,” deklaroi Bajdën para mbështetësve në Kaliforni.
Ish-zëvendëspresidenti i kohës së Barak Obamës vijon inercinë me fitore nga java e kaluar, të forcuar orët e fundit edhe nga mbështetja e rivalëve demokratë që tani janë larguar nga gara.
Ndërkohë mes pretendentëve të tjerë, senatorja Elizabet Uorën, nuk arriti të fitojë as në shtetin e Masaçusetit që ajo përfaqëson, ndërsa miliarderi i Nju-Jorkut, Majkëll Blumberg, që shpenzoi rreth 700 milionë dollarë në fushatë, mundi të marrë vetëm ishujt e vegjël amerikanë të Samoas.
Në garën për kandidimin për president, dy favoritët tani janë Bajdën dhe 78-vjeçari Sendërs.
Votimet e së martës ndanë rreth një të tretën e mbi 1,900 delegatëve që do të marrin pjesë në Konventën e Demokratëve në korrik, për të përcaktuar rivalin për Shtëpinë e Bardhë përballë presidentit Trump.