Partia e ekstremit të djathtë, Alternativa për Gjermaninë (AfD), aktualisht renditet e dyta në sondazhet për zgjedhjet e ardhshme federale. Por pse diskutohet kaq shumë për AfD-në?
Zyra Federale për Mbrojtjen e Kushtetutës (BfV), e klasifikon AfD-në si parti të dyshuar për ekstremizëm, ndërsa organizatën e saj rinore “Alternativa e Re” e ka shpallur zyrtarisht si ekstremiste shkruan DW.
Megjithëse AfD është distancuar nga krahu i saj rinor, politika e saj vijon të mbetet ekstreme.
Arsyeja? Qëndrimi i ashpër i kësaj partie ndaj emigrantëve në Gjermani, veçanërisht atyre me prejardhje myslimane.
Diskutimet për “riimigrimin”
AfD-ja ka futur në përdorim termin kontradiktor “riimigrim”, i cili ka shkaktuar kritika të shumta.
Para pak kohësh AfD-ja shpërndau në qytetin Karlsruhe “bileta riimigrimi”, shumica e të cilave u hodhën në kutitë postare të emigrantëve.
Qëndrimi ndaj komunitetit LGBTQ+
Edhe pse liderja e partisë AfD, Alice Weidel, ka një partnere femër, kjo parti kundërshton martesat e së njëjtës gjini dhe të drejtat e komunitetit LGBTQ+. Weidel është akuzuar gjithashtu për përhapje dezinformimi, për shembull, kur kohët e fundit tha se Adolf Hitleri ishte komunist.
Koalicion me AfD?
Megjithëse është shumë e pamundur që ndonjë parti të krijojë koalicion me AfD-në dhe që kjo parti të jetë pjesë e qeverisë së re, shumë kanë frikë se grupi konservator CDU/CSU i Friedrich Merz-it mund të vendosin të bashkëpunojnë me AfD-në për disa politika.
Dy javët e fundit para zgjedhjeve kjo ka shkaktuar protesta masive kundër fashizmit në të gjithë Gjermaninë.
Presidenti Trump mbështet akuzat e Vance ndaj Evropës
Presidenti amerikan Donald Trump i mbrojti akuzat e bëra nga zëvendëspresidenti J.D. Vance se liria se shprehjes nc Evropë është në rrezik. “Ata në Evropë po e humbasin të drejtën e tyre të mrekullueshme për lirinë e fjalës,” tha Trump në një takim me gazetarë.
Problemi me emigracionin
Trump tha se e kishte ndjekur fjalimin e Vance për lirinë e shprehjes në Evropë. “Unë mendoj se mendimi i tij është i drejtë”, shtoi Trump. Evropa ka gjithashtu “një problem të madh me emigracionin”.
Në fjalimin e tij në Konferencën e Sigurisë në Mynih, Vance tha se, sipas tij, liria e shprehjes në Evropë është duke u kufizuar. Si provë për këtë ai përmendi ndër të tjera dënimin e një emigranti irakian për djegien e disa kopjeve të Kuranit në Suedi, si dhe anulimin e zgjedhjeve presidenciale në Rumani për shkak të akuzave për ndërhyrje nga ana e Rusisë.
Kritika nga politikanët gjermanë
Kancelari Scholz dhe ministri gjerman i Mbrojtjes, Boris Pistorius, i quajnë “të papranueshme” komentet zëvendëspresidentit amerikan JD Vance për demokracinë evropiane.
Kancelari gjerman, Olaf Scholz i hodhi poshtë komentet e zëvendëspresidentit amerikan, JD Vance në Konferencën e Sigurisë së Mynihut, në lidhje me mungesën e demokracisë dhe fjalës së lirë në Evropë. Po ashtu Vance tha se imigrimi masiv është një çështje që nënvlerësohet nga të gjitha vendet e Evropës.
“Unë i kundërshtoj shprehimisht ato që tha zëvendëspresidenti i SHBA-së Vance në Konferencën e Sigurisë së Mynihut,” postoi Scholz në platformën X.
“Nga përvoja e nacional-socializmit, partitë demokratike në Gjermani kanë një konsensus të përbashkët: ky është kufiri kundër partive ekstremiste të djathta.”
Pistorius: Komentet e JD Vance ‘të papranueshme’
Edhe ministri gjerman i Mbrojtjes, Boris Pistorius, e kishte kritikuar më parë ashpër JD Vance, i cili i akuzoi qeveritë evropiane se injorojnë shqetësimet e votuesve lidhur me imigracionin si dhe se shtypin lirisë së fjalës.
“Nënpresidenti i SHBA vuri në pikëpyetje demokracinë për të gjithë Evropën,” tha Pistorius në Konferencën e Sigurisë në Mynih. “Ai flet për asgjësimin e demokracisë. Dhe nëse e kam kuptuar saktë, ai po i krahason kushtet në disa pjesë të Evropës me ato në rajone autoritare… kjo është e papranueshme.”
Përfytyrim i shtrembëruar për demokracinë
Në kushtet kur prag të zgjedhjeve parlamentare në Gjermani partia ekstremiste e djathtë AfD renditet e dyta në sondazhe, Pistoriusi u shpreh me sarkazëm lidhur me mendimin e Vance se liria e fjalës po pengohet.
Demokraci do të thotë që “partitë ekstremiste si AfD mund të bëjnë fushatë krejt normalisht, ashtu si çdo parti tjetër”, – tha Pistorius.
“Megjithatë demokraci nuk do të thotë që një pakica që bërtet më shumë ka automatikisht të drejtë dhe përcakton të vërtetën,” tha ministri gjerman i Mbrojtjes.
Pistorius e akuzoi Vance-in se ka një përfytyrim të shtrembëruar për demokracinë.
