Gazeta më e madhe malazeze, Vijesti, raportoi se Koalicioni Forumi Shqiptar me sloganin ‘Malësia na bashkon’ janë fitues të zgjedhjeve në komunën e Tuzit.
Gazeta shkruan se ky koalicion ka fituar shumicën e votave në zgjedhjet lokale të Tuzit.
Nga informacionet e para, Vijesti shkruan se koalicioni shqiptar ka fituar rreth 50 përqind të votave të numëruara.
Në votim ishin pesë lista, ndërsa të drejtën për të votuar e kishin 11.904 persona.
Kandidati shqiptar për të drejtuar komunën është Nikë Gjeloshaj. “Unë jam i bindur që bashkimi shqiptar ia ka dalë të fitojë. Unë besoj shumë se shqiptarët do të fitojnë dhe Tuzi do t’u çojë një mesazh të gjithëve kudo që janë. Zgjedhja personale nuk është aq e rëndësishme sesa t’u dërgojmë një mesazh bashkimi nga Tuzi, të gjithë shqiptarëve kudo që janë,” tha Gjeloshaj për TCH.
Kryetari i Komunës zgjidhet me shumicë të thjeshtë nga Këshilli Komunal njohur si Parlamenti i Tuzit, që në total ka 32 anëtarë.
Partitë shqiptare morën pjesë të bashkuara në zgjedhje në siglën “Forumi shqiptar” dhe me sloganin “Malësia na bashkon”. Në të marrin pjesë Alternativa Shqiptare, Aleanca Demokratike dhe Unioni Demokratik i Shqiptarëve.
Në anën tjetër, Partia Demokratike e Socialistëve, e Presidentit Milo Gjukanovic, garoi më vete, ndërsa kandidatë kanë paraqitur edhe Partia Socialiste Popullore, Demokratët dhe Social Demokratët.
