Masimiliano Alegri rithërritet në sto lin e Juventusit. Një zë i bujshëm po qarkullon në orët e fundit në shtëpinë e “Zonjës”: sipas “La Repubblica”, Andrea Anjeli mund të vendosë të rikthejë në stol ish-trajnerin e bardhezinjve, i cili është ende nën kontratë me torinezët.
Presidenti, i cili ka një lidhje të fortë miqësore me Alegrin, po mendon që të bëjë rokadën e bujshme në stol, por gjithnjë nëse situata e rezultateve dhe brenda dhomës së zhveshjes do të precipitonte.
NDARJE NË KLANE – “Juventinët janë të ndarë në tri fraksione të ndryshme: ata që e kanë me Sarrin, ata që e kanë me drejtorin sportiv Paratiçi dhe ata që e kanë me të dy, ndërsa është duke u krijuar edhe një grup nostalgjikësh të Alegrit, i ushqyer edhe prej atyre që gjashtë muaj më parë nuk do të donin ta shikonin as në kartolinë”, shkruante “La Repubblica”.
Interesante për t’u parë është se si do të rreshtohet tifozi Andrea Anjeli, i cili ka plotësisht tjetër qasje nga ajo e Andrea Anjelit drejtues: pas skrivanisë, presidenti (i cili këta gjashtë muajt e fundit është shprehur për Sarrin një herë të vetme, në festën e Krishtlindjes), zhvishet nga emocionet e pasioni dhe di të jetë i kthjellët duke reflektuar për situatën.
LARGOHET RAMSEJ – Nga faqet e “The Times” në Angli vjen një zë merkatoje brenda shtëpisë së kampionëve. Aron Ramsej mund të rikthehet në Premier Ligë, këtë herë si destinacion mund të ketë pjesën e kuqe të Mançesterit. Gazetari Toni Kaskarino shkruan se “Djajtë e kuq” kanë nevojë për një mesfushor me vështrim nga porta, duke nisur nga sezoni i ardhshëm dhe ai i uellsianit është profili i duhur në “Old Trafford”.
Ramsej, i cili këtë vit po gjen me të vërtetë pak hapësira në skuadrën e Juventusit, në rast të një shitjeje do të ishte një operacion shumë i suksesshëm financiar për bardhezinjtë, të cilët e transferuan nga Arsenali me parametër zero. Por, sipas “The Sun”, ankandi është i hapur dhe Paratiçi është në pritje të ofertave edhe nga klube të tjera të Anglisë.
