Kontributet e sigurimeve shoqërore për efekt të llogaritjes së pensionit do të paguhen nga të gjithë qytetarët, që janë të dypunësuar, më vete, për çdo vend pune.
- UDHËZIMI
Në udhëzimin e Drejtorisë së Përgjithshme të Tatimeve thuhet se pagesa e kontributeve të sigurimeve shoqërore dhe shëndetësore për personat e dypunësuar është i detyrueshëm.
Në rast se paga e qytetarit është më e lartë se paga minimale prej 24 mijë lekësh, llogaritja e kontributeve bëhet sipas pagës që merr.
Në udhëzim, Tatimet shpjegojnë se kontributet e sigurimeve shoqërore për efekt pensioni, në total, për të dy vendet e punës nuk mund të jenë më shumë se kontributi që paguhet për pagën maksimale.
E thënë ndryshe, kontributet nuk mund të jenë më shumë se 29,532 lekë.
“Kur i njëjti person është ekonomikisht aktiv në dy ose më shumë subjekte dhe në secilin prej tyre merr pagë më të lartë se paga minimale, llogaritja e kontributit të sigurimit shoqëror dhe sigurimit të kujdesit shëndetësor është e detyrueshme për çdo subjekt.
Në këtë rast, llogaritja e kontributit të sigurimit të kujdesit shëndetësor bëhet sipas pagës përkatëse, që merr nga secili subjekt, ndërsa masa e llogaritur e kontributeve të sigurimeve shoqërore, në total, të jetë jo më shumë se kontributi i llogaritur mbi pagën maksimale”, shpjegohet në udhëzimin e Tatimeve.
Kontributet e sigurimeve shoqërore dhe shëndetësore do të paguhen edhe në rast se qytetari paguhet në njërën nga vendet e punës me një rrogë më të vogël se paga minimale prej 24 mijë lekë.
“Kur i njëjti person është ekonomikisht aktiv në dy ose më shumë subjekte, dhe në njërin prej tyre paga është më e vogël se paga minimale, llogaritja e kontributit të sigurimit shoqëror dhe sigurimit të kujdesit shëndetësor është e detyrueshme për çdo subjekt.
Në këtë rast, llogaritja e kontributit të sigurimit të kujdesit shëndetësor bëhet sipas pagës përkatëse, që merr nga secili subjekt, ndërsa llogaritja për kontributet e sigurimeve shoqërore, në total, të jetë jo më shumë se kontributi i llogaritur mbi pagën maksimale”, thuhet në udhëzimin e Tatimeve.
/panorama
