Në Gjykatën për Krime të Rënda është duke u zhvilluar procesi gjyqësor në ngarkim të Fitim Dumanit dhe Denis Shabës, të akuzuar për “Shfrytëzim prostitucioni” dhe “Trafikim i personave të rritur”.A
Procesi është në fazën e shqyrtimit të provave të Prokurorisë, ndërsa para Gjykatës dhanë dëshminë e tyre 6 persona.
Këta të fundit kanë treguar për njohjen që kanë me Dumanin dhe marrëdhënien që ky i fundit ka pasur me dy vajzat që dyshohet se i ka shfrytëzuar. Nga dëshmitë e dhëna, mësohet se Dumani ka përdorur llogaritë e personave që njihte për të bërë tërheqjet e parave të dërguara nga vajzat, kryesisht nga Italia.
Ndërkohë, referuar hetimeve, dy prej vajzave kanë ushtruar prostitucionin edhe në Durrës, kundrejt shumave 100 deri në 300 euro. Dëshmitari me inicialet B.H., i cili nuk pranoi të dëshmonte në Gjykatë para oficerëve të Policisë Gjyqësore, ka thënë se shtetasen K. e njihte si bashkëshorten e tretë të Fitimit, ndërsa tregoi edhe për një rast të kalimit të eurove në llogarinë e tij.
“Kushëriri më ka thënë se është gruaja tij e tretë. Fitimi jetonte me këto dy femra në një dhomë të vogël pranë plazhit. Gjithmonë kam pyetur veten se si i mbante të dyja”, është shprehur ai.
Edhe shtetasi me inicialet S.E. ka deklaruar para Gjykatës se, mendonte se Fitimi ishte i martuar me shtetasen K., ndërsa tregon se me ta ka pirë vetëm një kafe dhe se kjo e fundit i ka dërguar njëherë një shumë eurosh. Sipas deklaruesit, shtetasja K. i kishte dhënë 500 euro, kjo pasi më herët ai i kishte dhënë Fitimit një borxh.
Por për Prokurorinë, eurot kanë qene 650 dhe qëllimi i dërgimit ka qenë tjetër, që t’i merrte i pandehuri dhe për të shlyer borxhin. Edhe dëshmitari i tretë, që doli para Gjykatës, konfirmoi se në emrin e tij është bërë tërheqja e një shume eurosh, të dërguara nga K., megjithëse, sipas dëshmitarit, nuk e njihte fare dhe eurot i ka marrë Fitimi.
DHUNA
Sipas dëshmitarit me inicialet S.Y, i cili ka punuar në një lokal me muzikë live, të cilin e ka pasur i pandehuri tjetër Denis Shaba, në një rast ka parë që Fitimi ka qëlluar shtetasen K.. Në seancë, prokurorja lexoi deklarimet e dhëna me herët nga ai, të cilat u pranuan edhe nga Gjykata si provë.
“Fitimi ka ushtruar dhunë ndaj K., më pas ajo ka qenë në gjendje të fikëti”, tha prokurorja ndërsa vazhdoi të lexonte dëshminë e S.Y.. “Njëherë, kur kanë qenë në lokal, Fitimi bashkë me K.D. dhe K.B., kjo e fundit është bërë xheloze për vajzën tjetër dhe ka përplasur shishen përtokë. Më pas, së bashku me Fitimin janë ngritur nga tavolina dhe në tualet, pasi ka ushtruar dhunë, K. ka qenë në gjendje të fikëti”, ka thënë dëshmitari para hetuesve.
