Detaje të reja janë zbardhur në lidhje me përgjimet e zhvilluara në kuadër të operacionit të SPAK në Elbasan ku u lëshuan 21 masa sigurie.
Organizata e drejtuar nga Suel Çela në Elbasan dyshohet se ka organizuar atentatin e dështuar të 25 Nëntorit 2020 ndaj Elvis Koçit.
Koçi gjithashtu kishte edhe mbiemrin Çaushllari dhe njihej me nofkën “Vis Korçari”. Në lidhje me ngjarjen në mars 2022 u arrestua si i dyshuar Migert Qosja. Ndaj tij ka pasur masë sigurie “arrest me burg” nga Gjykata që prej 29 nëntorit të vitit 2020. Ndërkohë dosja zbulon se pas kësaj ngjarje qëndron organizata e Çelës.
Në lidhje me atentatin u raportua për një sherr por më pas ngjarja agravoi në shkëmbim zjarri mes palëve. Nga pamjet e publikuara nga atentati dukeshin dy automjete të pozicionuara njëra pas tjetrës. Te mjeti “Ford”, ndodheshin Migert Qosja, Feliks Filaj dhe Eris Çekani, ndërsa tek mjeti tip “Mazda”,ndodhej Elvis Çaushllari (Koçi), që i shpëtoi atentatit.
