10:00- Realizohet takimi Haradinaj – Zaev
Kryeministri i Maqedonisë, Zoran Zaev, i cili po qëndron për vizitë në Kosovë, është shprehur i lumtur për ardhjen e tij këtu.
Ai ka thënë që qëllimi i kësaj vizite është thellimi i marrëdhënieve në mes të dyja vendeve dhe se takimi me krerët kosovar po realizohet pa ndonjë problem.
“Maqedonia dhe Kosova kanë marrëdhënie dhe bashkëpunim pozitiv e konstruktiv në të gjitha nivelet. Jemi këtu për të shkuar një hap tutje; për të hapur mundësi të reja për promovimin dhe thellimin e marrëdhënieve tona. Ndjehem i lumtur që jam kryeministri i parë i Maqedonisë që erdha për vizitë në Kosovë”, tha Zaev.
“Të dy shtetet do të punojnë që në të ardhmen të kemi marrëdhënie më të mira”, tha Haradinaj.
Zaev ka bërë me dije se gjatë ditës do të takojë edhe Kryetarin e Parlamentit, Kadri Veseli dhe Presidentin e Republikës së Kosovës Hashim Thaçi, “si liderë të dy vendeve që nuk kanë çështje të hapura”.
Më poshtë ju sjellim edhe videon e Televisionit “Alsat-m” nga konferenca për media e dy kryeministrave të të dyja shteteve, atë të Maqedonisë Zoran Zaev dhe të Kosovës, Ramush Haradinaj.
Drejtpërdrejt nga konferenca e kryeministrit Zoran Zaev dhe kryeministrit të Kosovës Ramush Haradinaj
Posted by Alsat-M.TV on Dienstag, 12. Dezember 2017
09:00 – Takimi mes Zoran Zaevit e Ramush haradinajt nisi me gjysmë vonesë.
Ka nisur në orën 9:00 takimi mes kryeministrave të Kosovës e Maqedonisë Ramush Haradinaj e Zoran Zaev.
Takimi ishte paraparë të niste në orën 8 e 30, por ka mundur të nisë vetëm në orën 9:00.
Është paraparë që takimi mes dy kryeministrave të zgjasë 1 orë e gjysmë.
Para takimit për Zaev-in u shtrua tepihu i kuq dhe prania e tij u nderua nga Njësiti Ceremonial i FSK-së.
Vizita e Kryeministrit Zaev është e para zyrtare e një kryeministri të Maqedonisë në Kosovë.
08:20- Kryeministri i Republikës së Maqedonisë, Zoran Zaev sot do të qëndrojë për një vizitë zyrtare njëditore në Kosovë.
Zaev do të takohet me homologun e tij kosovar, Ramush Haradinaj, me presidentin e Kosovës Hashim Thaçi si dhe me kryetarin e Parlamentit të Kosovës, Kadri Veseli.
Gjatë qëndrimit të tij në Kosovë, kryeministri i Maqedonisë do të takohet me përfaqësuesit e komunitetit të biznesit maqedonase- kosovare.
Në delegacionin që do të udhëhiqet nga kryeministri Zaev do të jenë edhe ministri i Ekonomisë, Kreshnik Bekteshi, ministri i Transportit dhe Lidhjeve Goran Sugareski, ministri i Kulturës Robert Alagjozovski, si dhe ministri pa portofol përgjegjës për Diasporën, Edmond Ademi.
Vizita e Zaev është vizita e parë zyrtare e një kryeministri të Republikës së Maqedonisë në Republikën e Kosovës.
