Presidenti serb, Aleksandër Vuçiç ka bërë një hap të madh gjatë përkujtimit të përvjetorit të bombardimeve të NATO-s ndaj Serbisë.
“Serbia nuk u vra dhe kurrë nuk do të vritet, pasi ne kemi një mision të madh që është e ardhmja jonë”, tha Vuçiç në ceremoninë qendrore të shtetit për të shënuar 19-vjetorin e bombardimeve të NATO-s.
Ai ka thënë se nuk do të lejohet më që dikush ta sulmojë Serbinë pasi tani ky vend është shumë i fuqishëm dhe me ushtri moderne. Duke ju drejtuar NATO-s, presidenti i Serbisë shpalli solemnisht:
“Po, ne duam partneritet me ju, duam të bëhemi miq edhe pse ishim armiq dikur, vetëm mos guxoni që të ndërhyni që të harrojmë atë që ka ndodhur në vendin tonë”, tha Vuçiç.
Presidenti serb shtoi se Kosova ishte një çështje e rëndësishme dhe se kompromisi ishte e vetmja mënyrë për të zgjidhur atë. Sulmin e Aleancës së Atlantikut të Veriut ndaj Serbisë, Vuçiç e ka cilësuar si një padrejtësi të madhe.
“Si duhet quajtur krimi? Çfarë mund të themi sot pasi ata vranë 2.500 njerëzit tanë? Për çdo sulm u vra një njeri?”, pyeti Vuçiç.
Takimi përkujtimor u bë në Aleksinac, një qytet që u bombardua disa herë nga NATO.
“Ata vranë fëmijë dhe të moshuar në parqe. Sot, viktimat tona janë imagjinare për to. Kjo është arsyeja pse vetëm një pjesë e trupit diplomatik është sot këtu dhe ne falënderojmë ata që kanë dënuar agresionin. Kjo është Serbia, një vend që ka dinjitetin e vet. Ne kurrë nuk do të harrojmë ata që dhanë jetën e tyre për vendin e tyre. Serbia nuk do të poshtërohet. Sot ne kemi një kartë në duart tona. Ne kemi të drejtë për të thënë atë që ne mendojmë. Ne do të përdorim këtë të drejtë deri në fund. Ne do të kujtojmë emrat e të gjitha viktimave tona”, tha Vuçiç.
Në ceremoni, përveç krerëve të Serbisë mori pjesë edhe presidenti i Republika Srbska. Diplomatët e vendeve të NATO-s bojkotuan përkujtimoren që nisi me zhurmën e sirenave.
Gjatë bombardimeve të NATO-s, Aleksinac u bombardua dy herë, ndërsa sulmi më i fuqishëm ndodhi më 5 prill ‘99, kur shtatë raketa goditën dy rrugët qendrore të qytetit, duke vrarë 11 veta dhe plagosur 50 të tjerë.(tesheshi)
