Një 74-vjeçar i cili një ditë më parë (1 shkurt) vrau të birin me thikë në shtëpi te ‘Kodra e Priftit’ është vendosur në pranga nga policia e kryeqytetit.
Sipas njoftimit të bluve babë e bir në gjendje të dehur kanë pasur një konflikt të çastit për motive të dobëta. Kjo ka detyruar të Hekuran Gjonin që të marrë thikën dhe të qëllojë të birin, Asim Gjonin i cili ndërroi jetë në spital.
Thika u sekuestrua si provë materiale.
“Specialistët për Hetimin e Krimeve të Rënda në bashkëpunim me Komisariatin e Policisë Nr. 4 bënë arrestimin në flagrancë të shtetasit Hekuran Gjoni, 74 vjeç, banues në Tiranë. Arrestimi i këtij shtetasi u bë pasi mbasditen e djeshme, gjatë një konflikti të çastit për motive të dobëta, ka goditur me mjet prerës djalin e tij shtetasin Asim Gjoni i cili si pasojë ka humbur jetën në spital”, informoi sot policia.
Pas krimit të kryer autori tregoi dje për hetuesit se nuk donte që ta vriste djalin, por situata doli jashtë kontrollit. Ai ka pohuar gjithashtu se me 37-vjeçarin kishte shpesh konflikte për shkak se sipas tij e shante dhe e bullizonte.
Materialet i kaluan Prokurorisë, për veprime të mëtejshme procedurale, për veprën penale të “Vrasjes për shkak të marrëdhënieve familjare”.
