Gjykata e Kurbinit ka dhënë masën e arrestit me burg për 21 vjeçarin Kreshnik Tusha, i dyshuar si njëri nga autorët e vrasjes së dyfishtë në Kurbin.
Masa e sigurisë për Tushën është bërë mbrëmjen e së martës në spitalin e Traumës në Tiranë ku po merr mjekim, pasi është i plagosur në këmbë. I riu ka mohuar që të ketë lidhje me ngjarjen, por pritet përgjigja e analizimit të njollave të gjakut që do të faktojnë ose jo përfshirjen e tij në këtë krim.
21-vjeçari dyshohet të jetë vrasës me pagesë, i cili mendohet të fshihet pas atentatit të mbrëmjes së të shtunës në Kurbin ku u ekzekutuan me 5 plumba kallashnikovi miku i Ervis Martinajt, Bujar Lika (Hasani) dhe Paulin Gjergji (Markaj), jashtë një hoteli në autostradën Mamurras-Lezhë në fshatin Gjormë. 37-vjeçari Lika ndërroi jetë në vend, ndërsa 53-vjeçari Paulin Gjergji nuk i mbijetoi plumbave duke gjetur vdekjen mëngjesin e së dielës në spitalin e Traumës në Tiranë.
Por kush janë Bujar Lika dhe Paulin Gjergji?
Bujar Lika kishte në pronësi lokalin “Dea Cafe” në ish-Bllok. Biznesin në Tiranë e kishte në emër të motrës Ardiana Toqi. 37-vjeçari rezulton një emër i njohur për policinë, pasi në vitin 2015 ishte mes të hetuarve për vrasjen e Enton Nikajt në Dajt. Për vrasjen e Nikajt fillimisht nga Shkalla e parë në 2016 u dënuan Emiljano Tasho 16 vjet, Erjon Biraci 2 vjet, Ervis Martinaj 1 vit e 4 muaj, Mirsad Kuçana 1 vit e 4 muaj dhe Bujar Lika 1 vit burg.
Por në Apel, Ervis Martinaj, Mirsad Kuçana dhe Bujar Lika që u vra mbrëmë morën pafajësi, ndërsa Tasho u dënua përfundimisht me 14 vite për vrasjen e Enton Nikajt dhe Erjon Biraci 2 vite, ky i fundit tani i lirë, pasi e kreu dënimin. Viktima Bujar Lika ishte mik i ngushtë i Ervis Martinajt, gjithashtu emër i njohur pas ngjarjes së 2018 në Bllok. Ndërkohë, Paulin Gjergji, i cili deri në 2004-ën e ka pasur mbiemrin, Markaj ka pasur kazino “Vegas” në zonën e ish-Bllokut në Tiranë, në rrugën “Sami Frashëri”.
