Babai i Çelnik Shahollit, i cili vrau gruan e tij pak ditë më parë, ka bërë përgjegjës djalin e tij 42-vjeçar për krimin e rëndë. 81-vjeçari Zaim Shaholli shprehet se kur ka ndodhur ngjarja kriminale ka qenë në Korçë së bashku me të shoqen për t’u kujdesur për disa toka që kishin në Maliq.
I moshuari tha për Report Tv se djali i tij nuk kishte asnjë lloj zanati dhe nuk punonte, ndërsa nuk lejonte as gruan e tij, Ardiana Shaholli, prej një kohe të gjatë që të hynte në punë. Ai tregon se jetonte në një banesë me djalin dhe fëmijët e tij, ndërsa krimin e ka marrë vesh nga të afërmit në Maliq.
Sipas 81-vjeçarit, familja mbahej me të ardhura të pakta nga pensionet e dy prindërve të autorit të vrasjes, ndërsa më vonë ju është shtuar edhe rroga e ulët e gruas së këtij të fundit. Ai thekson se i ka kërkuar djalit të shkonte në Greqi për të punuar, por ai nuk e dëgjonte, duke vazhduar të pinte shumë alkool.
Pinte alkool dhe po të kishte mundësi ta thante të gjithë shishen. Grindej shpesh me gruan e tij, sidomos gjatë vitit të fundit. Gruaja e tij ishte shumë e mirë. Përpiqej me të gjitha mundësitë që të mbante shtëpinë.
Babai i Çelnik Shahollit
Në fund, ai thotë se e ka braktisur të birin dhe nuk do ta ndjekë në gjyq e më pas, duke shtuar se tashmë do të jetë ai baba për 6 fëmijët e mbetur jetimë.
