Qyteti i Lushnjës ka përjetuar ngjarjet e viteve 1997-1998, pasi dy të rinj, banorë të këtij qyteti janë ekzekutuar në qëndër me breshëri automatiku. Zamir Latifi dhe Jurgen Hoxha, kanë mbetur të vrarë, ndërsa dy persona të tjerë Marjus Xhepexhiu, pronari i lokalit ku ndodheshin dy viktimat si dhe një kalimtar i rastit, 66-vjeçar Bujar Turku, që po ecte në atë moment me bicikletë,kanë mbetur të plagosur lehtë.
Gazeta “Shqiptarja.com” mëson se viktima Jurgen Hoxha, kishte vetëm katër ditë nga Belgjika, ku qëndronte si emigrant në këtë shtet. Policia e Lushnjës dyshon se atentati i rëndë që ndodhi jo shumë larg godinës së komisariarit të këtij qyteti, lidhet me pazaret e drogës në Belgjikë dhe Hollandë, ku Jurgen Hoxha dhe Zamir Latifi kanë qëndruar dhe dyshohet se janë marrë me aktivitet kriminal.
Burimet sqaruan se vrasja nuk ka lidhje fare me hasmëritë e vjetra të bandës së Lushnjës dhe se pistat e vetme hetimore është ajo e drogës dhe konfliktet e momentit mes të rinjve.
Autori i maskuar qëlloi i vetëm
Nga të dhënat që disponon “Shqiptarja.com” mësohet se personi që ka qëlluar në drejtim të lokalit ku ndodheshin Jurgen Hoxha dhe Zamir Latifi, ka qënë i vetëm. Një dëshmitar tregoi se personi ka zbritur nga një automjet dhe në duar mbante një armë automatike, ndërsa në kokë kishte një maskë të zezë. Personi ka ecur gati 20 metra, duke ju afruar dy të rinjve që qëndronin në kafene dhe menjëherë ka hapur zjarr me automatik. Ai ka lëshuar dy breshëri kallashnikovi, ndërkohë që ka lënë të vdekur në vend Jurgen Hoxhën dhe shokun e tij Zamir Latifi.
Plumbat kanë prekur pronarin e lokalit Marjus Xhepexhiu dhe një kalimtar të rastit. Dëshmitari që ka parë të gjithë ngjarjen, tregoi se pas kësaj personi që qëlloi me armë është larguar me shpejtësi duke u futur brenda në makinë, dhe më tej mjeti është larguar shumë shpejt në drejtim të daljes së Lushnjës, drejt zonës ish-fabrikës së Plasmasit.
Pista e parë, trafiku i drogës
Burime policore thanë për Shqiptarja.com se pista e parë e hetimeve është trafiku i drogës në Belgjikë dhe Hollandë.I njëjti motiv për atentatin ka qenë edhe një vit më parë kur ndaj Xhulio Shkurtit, Zamir Latifit dhe Sajmo Xhelilit u qëllua gjithashtu me breshëri automatiku. Ata mundën t’i shpëtojnë plumbave në 2016, por një vit më pas Latifi dhe Hoxha kanë mbetur viktima të kësaj përplasje të rëndë. Gjatë mbrëmjes së djeshme struktura të policisë kanë kryer një sërë hetimesh, ndërkohë efektiva të shumta jënë përqëndruar në rrugët e Lushnjës, që lidhen me Beratin, Rrogozhinën dhe Fierin.
Zamir Latifi, një vit më parë ju bë antentat
Zamir Latifit i është bërë atentat edhe një vit më parë me Xhulio Shkurtin, nipin e Aldo Bares. Nga ky atentat mori një plumb në këmbë Xhulio Shkurti, ndërsa i plagosur mbeti edhe Sajmo Xhelili. Xhelili dhe Shkurti kanë edhe lidhje familjare me njëri-tjetrin. Forca të shumta policie, përfshirë edhe RENEA-n, ndodhen në vendngjarje dhe po punojnë për identifikimin dhe kapjen e autorëve të këtij krimi.
Kontrolle të shumta janë kryer në dhjetëra banesa por pa rezultat. Policia dhe prokuroria e Lushnjës janë mobilizuar për të zbardhur ngjarjen e rëndë, megjithëse situata vijon të qëndrojë ende në mjegull. Nga ana tjetër shumë persona janë shoqëruar me shpresën se do të tregojnë diçka lidhur me krimin e rëndë. Kryesisht personat e shoqaruar kanë qënë shokë të viktimave. Pritet që në ditët në vijim policia dhe prokuroria e Lushnjës të bjerë në gjurmët e autorëve të këtij krimi që tronditi mbarë opinionin publik.
+
