Dy shqiptarë në kërkim ndërkombëtar të dënuar për vepra të rënda pas arrestimit në Mbretërinë e Bashkuar janë ekstraduar në Shqipëri. Dy personat janë Hektor Mahmutaj, 45 vjeç, lindur në Fier dhe Ronaldo Kolndreu, 21 vjeç, lindur në Tiranë.
Hektor Mahmutaj ishte shpallur në kërkim pasi Gjykata e Rrethit Gjyqësor Fier e ka dënuar me 25 vjet burgim, për kryerjen e veprave penale “Vrasja me paramendim”, e kryer në bashkëpunim dhe “Armëmbajtja pa leje”.
LEXO EDHE:
Të dënuar për vrasje dhe shitblerje armësh, ekstradohen 3 persona, dy nga Belgjika një nga Italia
Në vitin 1997, ai vrau me armë zjarri personin G. J., pranë rrugës automobilistike të fshatit Bejar të Mallakastrës. Kurse Ronaldo Kolndreu ishte shpallur në kërkim pasi Gjykata e Shkallës së Parë Tiranë e ka dënuar me 15 vjet burgim, për kryerjen e veprës penale “Vrasja me paramendim”, e mbetur në tentativë. Në vitin 2018, në ambientet e fabrikës së këpucëve, ai plagosi me thikë personin S. B.
Kapja e tyre u bë në sajë të bashkëpunimit të Interpol Tirana me Interpol Mançester në Mbretëri të Bashkuar, ku u bë i mundur arrestimi i tyre në Londër dhe ekstradimi drejt vendit tonë.