Gjykata e Krimeve të Rënda ka dhënë masën e sigurisë ‘Arrest me burg’ për Esat Canin, i cili vrau të dashurin e motrës së tij të martuar pak ditë më parë në Zall Bastar të Tiranës.
Gjykata ka dhënë masën ‘detyrim paraqitje’ për Elida Canin si dhe bashkëshortin e saj Dëfrim Kurtin.
31-vjecari Esat Cani akuzohet se vrau me mjete të forta 34-vjeçarin Arben Gjeci në bashkëpunim me kunatin e tij Dëfrim Kurti.
Cani në dëshminë e dytë pranoi krimin dhe thotë se Arben Gjeci para se të takohej me motrën, po pinte kafe me burrin e saj, Dëfrimin.
Esat Cani: Dyshoja që Arbeni ngacmonte ose nusen time ose motrën. E ruaja prej tre ditësh. Ditën e enjte e kam ruajtur që në mëngjes. Arben Gjeci ishte në kafe bashkë me kunatin tim, Dëfrimin dhe më pas u ndanë. E pashë kur u afrua te shtëpia e motrës. Fillimisht nuk dija ç’të bëja. Pasi i pashë të dy, bota m’u errësua. Isha shumë rëndë. Gjeta një levë dhe kur hyra brenda, motra me Arbenin ishin gjysëm të zhveshur. Nuk durova dot, e godita disa herë me levë. Më pas u tremba dhe s’dija ç’të bëja. E pashë me gjak dhe bashkë me motrën kishim hall nga fjalët e fshatit. Menjëherë vendosëm që trupin ta nxirrnim në rrugë dhe të hapnim fjalën që ishte rrëzuar nga një lartësi. Më pas ika në shtëpi dhe isha shumë i trembur.
