Teksa fqinjët kanë folur me superlativa për 28-vjeçarin Marjo Majollari, i cili mbeti i ekzekutuar mbrëmjen e të martës poshtë pallatit ku banonte në zonën e Kinostudios, ai njihej si një person i qetë dhe i sjellshëm.
Policia gjithashtu nuk ka gjetur precedentë për të shkuarën e tij, në Shqipëri, për aq kohë sa i riu kishte jetuar, pasi 5 muaj kishte që ishte kthyer nga Suedia ku kishte kërkuar azil sepse pretendonte që mund ta vrisnin për hakmarrje.
Dhe ajo që ai i druhej, ndodhi mbrëmjen e 10 Prillit në kryeqytet.
Marjo ishte shef kuzhine dhe kishte punuar në shumë restorante, edhe jashtë Shqipërisë, përfshirë Omanin ku kishte jetuar për disa kohë.
NGJARJA
Rreth orës 20:25, Policia e Tiranës është lajmëruar përmes një telefonate në sallën operative, për të shtë- na me armë zjarri në zonën e Kinostudios. Menjëherë në vendngjarje janë nisur shërbimet më të afërta të Komisariatit nr.4, që kanë konstatuar trupin e pajetë të një të riu.
Brenda pak minutash viktima është identifikuar si Mario Majollari, 28 vjeç, banor në pallatin pranë vendit ku u qëllua për vdekje. Policia tha se në vendin e ngjarjes janë gjetur 4 gëzhoja arme zjarri, që dyshohet të jetë pistoletë tip “TT”.
Burimet thanë se viktima është qëlluar në kokë dhe në trup e për pasojë ka gjetur vdekjen e menjëhershme.
Atentatorët kanë shfrytëzuar momentin kur në zonë nuk kishte shumë lëvizje. Në rrugicën me ndriçim të dobët nuk ka pasur lëvizje në momentin e krimit, kjo edhe për arsye se në atë moment po luheshin ndeshjet e “Champions League” dhe rrugët ishin të boshatisura, pasi banorët ishin nëpër lokale duke parë ndeshjet. Banorët e zonës u shprehën mbrëmë se kanë dëgjuar vetëm të shtënat dhe nuk kanë parë asgjë. PANORAMA/
