Vrasja e babait të katër fëmijëve në Kamëz pas një tentative grabitje ka tronditur opinionin publik ditët e fundit.
52-vjeçari u vra për 90 mijë lekë të vjetra që kishte në dyqanin e tij modest. Ndërkohë ditën e sotme vëllai i Agim Bucit, Lutfiu ka thënë se gjithçka ia ka lënë në dorë shtetit.
Ndonëse familjarët e autorëve janë larguar nga shtëpitë e tyre në Kamëz, nga frika e një hakmarrje të mundshme, vëllai i viktimës ka thënë se nuk ka punë me asnjë njeri.
Ai madje ka treguar se si autorët tentuan të merrnin djalin e vogël, si kërcënim për paratë.
Lutfiu ka thënë:
Ne i kemi lënë në dorë shtetit. Unë nuk kam punë me njeri. Nëse shteti nuk bën drejtësi, siç bëri policia që i arrestoi në kohë rekord njerëzit mund të armatosen vetë për të mbrojtur veten. Ata kanë hyrë nga kjo derë këtu dhe kanë kanë hyrë, aty janë përballur me gruan. Kanë dashur të marrin djalin. I kanë thënë Lekët dhe kanë qëlluar. Ka dëgjuar të shtënat vëllai dhe ka dalë. Është përleshur me to dhe ata e kanë qëlluar në gjoks. Vëllai ka vdekur që këtu. Fëmija është terrorizuar, nuk fle gjithë natën.Zona është pa drita. Agimi ka paguar taksat 820 mijë Lekë para një jave. 20 mijë Lekë vetëm dritat. Por edhe policia nuk duhet t’i lejë njerëzit nëpër pallate të konsumojnë lëndë narkotike se bëhen problem për sigurinë”.
Dy autorët kanë pranuar krimi, ndërsa thuhet se vrasësi i cili ka qëlluar mbi pronarin e marketit ka qenë Vladimir Kurti. Shoku i tij Rruzhdi Hodo ka thënë se ai thjesht e ka shoqëruar, e megjithatë ka qenë ai që ka fshehur armën e krimit.
Kurti njihet si përdorues i drogës dhe si grabitës me dhunë dhe thuhet se ka kryer vjedhje me dhunë dhe grabitje edhe në Gjermani, ku ka qëndruar një periudhë kohe përpara se të rikthehej në Shqipëri.
