Devis Hoti është 18 vjeçari i cili akuzohet si i dyshuari kryesor për vrasjene kushëririr të tij, Flamur Duçi, në një ngjarje horror të ndodhur në qytetin e Korçës. Ditën e djeshme është mbajtur seanca gjyqësore në ngarkim të autorit, ndërsa mbrojtja ka kërkuar një masë arresti të lehtë për 18-vjeçarin.
Por gjatë zhvillimit të seancës, prokuroria ka zbuluar detaje rrëqethëse në lidhje me vrasjen e Duçit. Sipas organit të akuzës, Flamur Duçi ka tentuar të heqë bluzën, në momentin që kushëriri e ka qëlluar disa herë me thikë dhe i ka vënë flakën, për ta djegur.
Ndërkohë, po sipas akuzës, në trupin e viktimës janë gjetur 8 dëmtime me thikë, ndërsa në dorë mbante një fije floku, që i është marrë për provë dhe pritet t’i bëhet testi i ADN-së, për të zbuluar autorin e vërtetë të krimit, mëson BalkanWeb.
Gjithashtu, viktima ka rezultuar me djegie të shumta në krah dhe trup. Në dyqan dhe rrugë ka pasur gjak, por mungon thika e bulmetit, me të cilën është kryer krimi.
Nga ana tjetër, edhe i dyshuari për krimin rezulton me lëndime në trup, çka ngre dyshimet që të ketë pasur përleshje mes tyre, para se të ndodhte krimi. Nga përgjimet ambientale të siguruara deri më tani, ka rezultuar se autori i dyshuar po përpiqet të trillojë për ngjarjen dhe të detyrojë familjarët të gënjejnë, dhe kjo ka shtuar më tepër dyshimet se ai mund të jetë vrasësi i Flamur Duçit.
