Menjëherë pasi kanë bërë këqyrjen e vendit të ngjarjes, mbledhjen e provave dhe pyetjen paraprake të dëshmitarëve, oficerët e Krimeve të Rënda kanë ngritur edhe pistat e para hetimore pas vrasjes mafioze te avokatit Ravik Gurra.
Pista e parë mësohet se është ajo e një vrasjeje të mundshme për shkak të detyrës. Kjo, edhe për shkak të çështjeve të fundit që ai ka mbrojtur në proceset gjyqësore.
Por, nga ana tjetër, edhe për shkak të miqësisë që ai ka me pjesëtarë të familjes Çapja në Elbasan, të cilët herë pas here kanë qenë të përfshirë në ngjarje të ndryshme kriminale, herë si të dyshuar e herë si viktima.
Megjithatë, burimet thanë se nuk përjashtohen as pista të tjera hetimore, të cilat do të vlerësohen edhe pasi t’u merret deklarim familjarëve të tij apo miqve.
Ndërsa deri tani duket se hetimet janë përqendruar te detyra e tij si avokat, të cilën e ushtron prej shumë vitesh.
Sa u përket autorëve të dyshuar, burimet thanë se nuk përjashtohet mundësia që të jenë vrasës me pagesë, që mund të kenë marrë porosi nga persona të tjerë për eliminimin e avokatit 50-vjeçar.
