Prokuroria e Elbasanit ka mbyllur hetimet dhe ka dërguar për gjykim çështjen për vrasjen e Gazmend Kurmakut në tetor të vitit 2021.
Në lidhje me këtë ngjarje akuzohen Erjon Llapushi për veprën penale vrasje me dashje dhe Luan Dulellari për moskallëzim krimi.
Ngjarja ndodhi në një lokali ku Kurmaku punonte si kamerier. Ai u përfshi në një debat me klientin Erjon Llapushi i cili më pas e goditi me grusht duke i shkaktuar dëmtime të rënda. Kurmaku ndërroi jetë në spital pas disa ditësh në gjendje kome.
Njoftimi i prokurorisë
Prokuroria pranë Gjykatës së Shkallës së Parë Elbasan njofton se ka përfunduar hetimi dhe është dërguar për gjykim procedimi penal nr.1469, për ngjarjen e ndodhur më datë 02/10/2021 me të pandehur shtetasit:
– Erjon Llapushi hetuar më masën e sigurimit “Arrest në burg”, akuzuar për veprën penale të “Vrasjes me dashje” parashikuar nga neni 76 i K.Penal
– Luan Dulellari, hetuar me masën e sigurimit “Arrest në burg”, akuzuar për veprat penale të “Moskallëzimit të krimit” parashikuar nga neni 300/1 i K.Penal dhe “Përkrahjes së autorit të krimit” parashikuar nga neni 302/1 i K.Penal, ku ka mbetur viktimë shtetasi Gazmend Kurmaku.
Ngjarja i referohet datës 02.10.2021, ku ka ndodhur një konflikt në ambientet e subjektit “Rozafa Fish” në Labinot të Elbasanit, midis disa klientëve dhe punonjësit të restorantit të quajtur Gazmend Kormaku, i cili pas një debati me autorin është goditur me grusht nga ky i fundit. Si pasojë viktima ka humbur jetën me datë 07/10/2021.
Hetimet u ndoqën nga Drejtuesi i Prokurorisë Z. Kreshnik AJAZI.
