Prokuroria e Fierit ka çuar për gjykim dosjen ndaj Klajdi Mukës dhe Florian Mukës, të dyshuar si autorët e vrasjes së Grei Bihucit, një ngjarje që tronditi opinionin publik mbi një vit më parë.
Dy kushërinjtë akuzohen për “vrasje me paramendim, kryer në bashkëpunim” dhe “prodhim, mbajtje, blerje apo shitje pa leje e armëve të ftohta”. Sipas hetimeve, ngjarja është kryer me qëllim të qartë eliminimi dhe është ndjekur me veprime të koordinuara nga të dy autorët.
Dosja tashmë i kalon Gjykatës së Fierit për shqyrtim, ndërsa pritet që në seancat e ardhshme të dalin në dritë më shumë detaje rreth motiveve të vrasjes dhe rolit të secilit prej të pandehurve.
NJOFTIMI:
Prokuroria pranë Shkallës së Parë e Juridiksionit të Përgjithshëm Fier, përfundoi hetimet dhe dërgon në gjyq Florian Muka dhe K. Muka për veprat penale ‘Vrasja me paramendim’, e kryer në bashkëpunim dhe ‘Prodhimi, mbajtja, blerja apo shitja pa leje e armëve të ftohta’, të parashikuara nga nenet 78/1 e 25 dhe 279/2 të Kodit Penal.
Nga hetimet e kryera mbi procedimin penal nr. 382 të vitit 2025, rezultoi e provuar se, në datën 11.03.2024, rreth orës 11:30, në lagjen “Kongresi i Përmetit” të qytetit të Fierit, gjatë një takimi për t’u sqaruar lidhur me një konflikt të ndodhur ditë më parë dhe të publikuar në rrjetet sociale, të pandehurit, të cilët kanë pasur me vete armë të ftohta, në bashkëpunim me njëri-tjetrin kanë goditur viktimën, duke i shkaktuar atij vdekjen e menjëhershme.
Prokuroria pranë Gjykatës së Shkallës së Parë të Juridiksionit të Përgjithshëm Fier kërkoi Deklarimin fajtor të të pandehurit Florian Muka për kryerjen e veprës penale “Vrasja me paramendim” e kryer në bashkëpunim, dhe në bazë të neneve 78/1 e 25 të Kodit Penal dënimin e tij me 25 vjet burgim.
Si dhe deklarimin fajtor të të miturit në konflikt me ligjin K. Muka për kryerjen e veprës penale “Vrasja me paramendim” e kryer në bashkëpunim, dhe në bazë të neneve 78/1 e 25 dhe 51 të Kodit Penal dhe 97/2 të Kodit të Drejtësisë Penale për të Mitur, dënimin e tij me 12 vjet dhe 6 muaj burgim.
