I biri i gazetarit të vrarë saudit, Jamal Khashoggi, është lejuar të largohet nga Arabia Saudite, dhe është nisur të enjten drejt Shteteve të Bashkuara të Amerikës. Lajmin e kanë bërë të ditur organizata “Human Rights Watch” dhe një mik i familjes Khashoggi, për “NBC News”.
Salah Khashoggi, i cili mban edhe pasaportë amerikane, është fotografuar më herët, këtë javë, me princin saudit të Kurorës, Mohammed bin Salman, dhe me mbretin saudit, Salman, gjatë një vizite ngushëlluese, teksa është dukur shumë i trishtuar, duke shtrënguar duart me ta.
Kjo vizitë, dhe thirrjet e mëhershme telefonike për ngushëllime nga mbreti dhe princi i Kurorës, kanë ndodhur teksa vazhdojnë të ekzistojnë dyshime të mëdha për njohuritë dhe përfshirjen e princit të kurorës në vrasjen e gazetarit.
Anëtarë të familjes Khashoggi, disa prej të cilëve ndodhen në Arabi Saudite, në Turqi dhe në Emiratet e Bashkuara Arabe, kanë shprehur dëshirën të ribashkohen jashtë mbretërisë saudite, teksa kanë pasur dyshimet e tyre se Salahut i është pamundësuar largimi nga vendi që një kohë.
