Mikel Gjovalin Alia është vetëdorëzuar në polici pasi akuzohej si personi që nxori në pritë mikun e tij, Eri Zefin, i cili u gjet pa jetë në fillim të muajit tetor. Gjovalin Alia rezultonte i shpallur në kërkim prej dy javësh.
40-vjeçari dyshohet se ka bashkëpunuar me dy persona të tjerë, të shpallur gjithashtu në kërkim, për vrasjen e Eri Zefit. Ai dhe Eri ishin shokë të ngushtë, prej fëmijërisë.
Gjatë marrjes në pyetje nga grupi hetimor mësohet se ai ka deklaruar para Policisë se nuk e ka nxjerrë në pritë shokun e tij, por kanë qenë duke udhëtuar së bashku, kur janë sulmuar nga disa persona që tentuan t’i grabisnin.
Pas ngjarjes së rëndë, Gjovalin Alia është strehuar në zonën e Fanit, po në Mirditë, ku edhe u gjet i vrarë Eri Zefi. Sipas “Panorama”, Alia është shprehur se autorët që kanë bërë atentat ndaj tyre kanë tentuar të vrasin edhe atë, por për fat të mirë, 40-vjeçari ka arritur të shpëtojë.
Ai ka thënë para policisë:
Kam qenë duke udhëtuar me Eri Zefin, por nuk e kam nxjerrë në pritë për ta ekzekutuar. Kanë dalë për të na grabitur dhe kanë dashur të më vrasin dhe mua”.
Duke qenë se ishin shokë me njëri-tjetrin, Alia dyshohet se e ka nxjerrë nga shtëpia Zefin që t’ia çonte në pritë dy autorëve ende të paidentifikuar, të cilët ishin caktuar për të kryer vrasjen. Dyshohet se ata janë larguar në drejtim të Kosovës.
Një letër-porosi e dërguar autoriteteve të drejtësisë kosovare pritet të hedhë dritë mbi hyrje-daljet e dy autorëve të vrasjes.
Letër-porosia është dërguar nga Prokuroria e Lezhës, e cila po drejton hetimin për vrasjen e Eri Zefit, duke kërkuar nga pala kosovare të japë të dhëna për dy persona që kanë hyrë në territorin e Kosovës nga Shqipëria dhe më pas janë larguar nga Kosova në drejtim të Gjermanisë.
