Makina me të cilën dyshohet se janë larguar autorët është gjetur e djegur në një zonë në afërsi të Koplikut mengjesin e dites se sotme.
Në një video të mbërritur në redaksinë e Faxweb.al shihet moment i djegies së makinës rreth orës 3 të mëngjesit të sotëm, ndërsa nga Policia e Shkodrës ende nuk ka një konfirmim se kur ka ndodhur ngjarja.
Ka qenë një kalimtar ai që ka filmuar gjithçka, në momentin kur flakët kanë përpirë mjetin tip benz, brenda të cilit policia gjeti paraditen e sotme një armë automatike.
Boran Berçama dhe Silva Ndoci u raportuan të vdekur rreth orës 6:00 të mëngjesit të sotëm, ndërsa vrasja mendohet që të ketë ndodhur pas mesnate. Mister mbetet fakti sesi ka mundur që të shpëtojë djali i tyre i mitur, i cili në mëngjes është gjetur në prehrin e së ëmës të vdekur.
Nga mënyra sesi ka ndodhur ngjarja, burime policore shprehen se kemi të bëjmë me një atentat të tipit mafioz, pasi lëvizjet që kanë kryer autorët kanë qenë të mirëmenduara.
Ata e kanë pritur çiftin në hyrje të banesës së tyre, aty ku më pas me një breshëri plumbash kanë qëlluar mbi ta me më shumë se 25 gëzhoja që u gjetën në vendngjarje.
