Detaje të reja janë zbuluar lidhur me mënyrën e vrasjes së shqiptarit Albert Bako në burgun e Athinës.Mësohet se vrasja ka ndodhur në godinën E të burgut rreth orës 12: 45. Viktima ndodhej në qelinë e tij bashkë me shokët e tjerë po shqiptarë. Mësohet se autorët e krimit, të akuzuar për të njëjtin krim, kanë pasur dijeni se Bako po transferohej në burgun e Greqisë.
Ata janë futur në qelinë e tij dhe e kanë goditur në qafë me një thikë artizanale. Pyetja që ngrejnë autoritetet vendase është se përse në atë orë dera e qelisë ishte e hapur. Me ligj në Greqi ajo lejohet të jetë e hapur deri në orën 11:30 pasi të burgosurit janë numëruar dhe më pas kanë ngrënë drekën. Përveç këtij detaji, në qelinë e vrasësit u gjetën mbi 300 euro dhe thika artizanale duke hedhur dyshime lidhur me sigurinë në burgje.
Vrasësi i Bakos, identiteti i të cilit ende nuk është bërë i ditur, po ashtu akuzohet për vrasjen e avokatit Michalis Zafiropulos.
Vrasja e Albert Bakos është në vazhdën e disa vrasjeve në Greqi. Që prej vrasjes së ekstremistit grek në Bularat, disa shqiptarë janë gjetur të vrarë në burgjet greke në rrethana ende të paqarta. Disa javë më parë, një tjetër shqiptar humbi jetën në burgën e Triakalasë nga shkaqe që ende nuk janë zbuluar.
